Sulmet ajrore izraelite në Gaza, 10 anëtarë të familjes së liderit të Hamasit humbin jetën

Foto ilustruese

IZRAEL- Forcat izraelite vranë të paktën 24 palestinezë në tre sulme të veçanta ajrore herët mëngjesin e sotëm në qytetin e Gazës, njoftuan zyrtarët shëndetësorë, ndërsa tanket u futën më thellë në qytetin Rafah në pjesën jugore të enklavës.

Dy nga sulmet goditën dy shkolla në qytetin e Gazës, duke vrarë të paktën 14 persona, thanë burimet mjekësore. Një tjetër goditje në një banesë në kampin Sati (Plazh), një nga tetë kampet historike të refugjatëve në Rripin e Gazës, mori jetën e 10 të tjerëve. Rezidenca e goditur në Sati i përkiste familjes së liderit politik të Hamasit, Ismail Haniya. Një nga motrat e tij dhe të afërmit e tjerë u vranë, thanë anëtarët e familjes dhe burimet mjekësore.

Haniya, i cili kryeson diplomacinë e Hamasit dhe është një nga figurat publike të grupit militant islamik që sundon Gazën, ka humbur disa të afërm nga sulmet ajrore izraelite që nga 7 tetori, duke përfshirë tre nga djemtë dhe katër nipërit e tij. Në prill, vetë Haniya tha se rreth 60 anëtarë të familjes së tij ishin vrarë deri më tani që nga fillimi i luftës më 7 tetor.

Forcat e armatosura izraelite njoftuan se kishin vënë në shënjestër militantët në qytetin e Gazës gjatë natës, të cilët ishin të përfshirë në planifikimin e sulmeve kundër Izraelit. Këta luftëtarë përfshinin disa që kishin marrë pjesë në marrjen e pengjeve dhe disa që kishin marrë pjesë në sulmin e 7 tetorit nga Hamasi në tokën izraelite.

Forcat Ajrore izraelite goditën dy struktura “të përdorura nga terroristët e Hamasit në Sati dhe Daraz Tufah në pjesën veriore të Rripit të Gazës. Terroristët operuan nëpër komplekset e shkollave të përdorura nga Hamasi si mburojë për aktivitetet e tij terroriste”, thuhet në deklaratën e forcave të armatosura. Hamasi mohon përdorimin e infrastrukturës civile, si shkollat ​​dhe spitalet, për qëllime ushtarake.

lufta izrael-hamas