Europa po pi më pak birrë, industria 52 miliardë euro po hedh sytë drejt versioneve pa alkool

Tregu europian i birrës po përballet me rënie të vazhdueshme të prodhimit dhe konsumit, ndërsa birra pa alkool po shndërrohet në një nga shpresat kryesore të industrisë për të rikthyer konsumatorët.

Sipas raportit më të fundit të shoqatës “Brewers of Europe”, konsumi i birrës në Bashkimin Europian ka rënë me 9.2% që prej vitit 2019, ndërsa prodhimi është tkurrur me 8.6%.

Vetëm gjatë periudhës 2024–2025, konsumi ra me 3.2%, ndërsa prodhimi u ul me 2.9%.

Pandemia konsiderohet një pikë kthese për tregun, pasi ndryshoi zakonet e konsumatorëve, uli frekuentimin e bareve dhe restoranteve dhe shtoi presionin mbi të ardhurat e familjeve.

Edhe pse inflacioni është zbutur në disa vende, pasiguria ekonomike vazhdon të ndikojë shpenzimet për argëtim, udhëtime dhe konsum jashtë shtëpisë.

Industria europiane e birrës mbetet megjithatë një sektor me peshë të madhe ekonomike.

Në Europë operojnë rreth 10 mijë fabrika birre, nga bizneset e vogla familjare deri te grupet e mëdha shumëkombëshe.

Sektori mbështet rreth 2 milionë vende pune, drejtpërdrejt dhe tërthorazi, dhe krijon rreth 52 miliardë euro vlerë të shtuar çdo vit.

Gjermania ruajti në vitin 2025 vendin e parë si prodhuesja më e madhe e birrës në Europë, me mbi 79 milionë hektolitra.

Ajo u pasua nga Spanja me rreth 41.5 milionë hektolitra dhe Polonia me mbi 33 milionë hektolitra.

Në dhjetëshen e vendeve kryesore përfshihen gjithashtu Britania e Madhe, Franca, Belgjika, Republika Çeke, Italia, Rumania dhe Austria.

Por ndryshimi më i dukshëm në treg po vjen nga birra pa alkool.

Shitjet e kësaj kategorie u rritën me 5.87% nga viti 2024 në vitin 2025 dhe me 38.3% krahasuar me vitin 2020.

Birra pa alkool përbën tashmë 8.2% të tregut të përgjithshëm të birrës në Bashkimin Europian.

Kjo do të thotë se rreth një në çdo 12 birra të konsumuara në Europë është pa alkool.

Rritja lidhet me ndryshimin e zakoneve të konsumatorëve, kujdesin më të madh për shëndetin dhe kërkesën për produkte që mund të konsumohen në më shumë raste të ditës.

Prodhuesit po investojnë në receta të reja, teknologji dhe përmirësim të shijes, me synimin që birra pa alkool të mos shihet më si produkt dytësor.

Raporti vëren se aftësia e sektorit për të kombinuar inovacionin me traditën mbetet një nga avantazhet kryesore të industrisë europiane.

Në një treg ku birra tradicionale po humbet terren, versionet pa alkool po shfaqen si kategoria që mund të mbështesë rritjen e ardhshme.

Për industrinë 52 miliardë euroshe, basti i ri është pikërisht te “asgjëja”: më pak alkool, por më shumë konsumatorë./Skyweb