Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
BOTA
Evropa 'shtrydh' Orbanin për Paradën e Krenarisë/ Ndalimi i Budapestit sjell sanksione, cili është "opsioni bërthamor" i Nenit 7
m.lPërditësimi i fundit 26 Maj 2025, 21:50
BRUKSEL- Një aleancë e shteteve anëtare të BE-së, përfshirë Francën, Gjermaninë dhe vendet nordike, po i bën thirrje Komisionit Evropian të ndërmarrë veprime të menjëhershme kundër Hungarisë për shkak të qëllimit të Kryeministrit Viktor Orbán për të ndaluar ngjarjet e Paradës së Krenarisë në Budapest.
Iniciativa, e koordinuar nga Ministria e Jashtme Holandeze, përfshin një deklaratë të përbashkët nga 14 vende, duke i bërë thirrje Komisionit të përdorë "mjetet e sundimit të ligjit pa vonesë" për të detyruar Budapestin të rishqyrtojë vendimin. Deklarata është nënshkruar nga Austria, Belgjika, Republika Çeke, Danimarka, Estonia, Finlanda, Irlanda, Letonia, Lituania, Luksemburgu, Holanda, Portugalia, Sllovenia dhe Suedia, ndërsa Franca dhe Gjermania e kanë nënshkruar gjithashtu atë, sipas një diplomati evropian që foli për Politico.
Deklarata shpreh shqetësim të fortë për shtypjen e vazhdueshme të të drejtave LGBTIQ+ në Hungari dhe thekson se ligjet e reja të qeverisë Orbán, të cilat kriminalizojnë ngjarjet përkatëse, shkelin parimet themelore të BE-së, siç përcaktohen në Nenin 2 të Traktatit për Bashkimin Evropian.
Komisioni tashmë ka "ngrirë" 18 miliardë. euro fonde të BE-së për Hungarinë për shkak të shkeljeve të sundimit të ligjit, por deri më tani nuk ka vendosur sanksione të mëtejshme. Komisionerja për Barazi, Hadia Lahbib, thuhet se tha në një takim javën e kaluar se nuk ka mbështetjen e Presidentes Ursula von der Leyen për masa të reja, duke hedhur poshtë propozimin për të vendosur "masa të përkohshme" që mund ta detyrojnë Hungarinë të lejojë zhvillimin e Paradës së Krenarisë.
Mungesa e reagimeve të mëtejshme po shkakton acarim në disa kryeqytete evropiane, të cilat e shohin qeverinë hungareze duke i shpërfillur sistematikisht vlerat dhe detyrimet e saj brenda BE-së.
"Opsioni bërthamor" i Nenit 7
Në sfond, diskutimi po intensifikohet për të aktivizuar procedurën e Nenit 7, e cila mund të çojë në heqjen e të drejtës së votës së Hungarisë në Këshillin e BE-së. Hapi i parë kërkon një shumicë prej katër të pestash të shteteve anëtare për të vërtetuar një shkelje të parimeve të BE-së nga Budapesti. Pastaj, kërkohet unanimiteti i 26 vendeve për të hequr një votë. Aktualisht, sipas zyrtarëve evropianë, 19 vende e mbështesin këtë veprim, një numër tre më pak se pragu i kërkuar për fazën e parë. Megjithatë, sfida më e madhe konsiderohet të jetë konsensusi përfundimtar.
