Gafa e Fox News! Tregon Kievin si pjesë të Rusisë gjatë transmetimit live të meshës së Pashkëve, reagon Ministria e Jashtme e Ukrainës: Duhet të kërkohet falje...

UKRAINË- Televizioni amerikan Fox News, gjatë transmetimit të liturgjisë së Pashkës nga e gjithë bota e tregoi Kievin si pjesë të Rusisë. Gjatë mbulimit të shërbimeve të Pashkëve Fox News transmetoi pamjet duke përfshirë edhe shërbimin që mori pjesë presidenti rus Vladimir Putin në Moskë. 

Ndërkohë rrjeti i lajmeve transmetoi imazhe të drejtpërdrejta nga shërbimet fetare të Pashkëve në Kiev, duke e keqidentifikuar kryeqytetin ukrainas si një qytet rus. Gabimi thuhet se qëndroi në ekran për 20 minuta.

Menjëherë pas kësaj gafe ka reaguar edhe Ministria e Jashtme e Ukrainës, e cila i ka bërë thirrje Fox News për kërkim falje për etiketimin e Kievit si “qytet rus” gjatë transmetimit të lajmeve.

“Nëse ky ishte një gabim dhe jo një deklaratë e qëllimshme politike, duhet të kërkohet falje dhe një hetim se kush e bëri gabimin”, shkroi zëdhënësi i Ministrisë së Jashtme, Heorhii Tykhyi në X.

Edhe pse ai nuk i përmendi ato me emër, presidenti Volodymyr Zelenskyy u duk se kritikoi gjithashtu Fox News në fund të një deklarate, në të cilën ai raportoi shkelje të shumta të armëpushimit ruse në vijën e frontit që nga shpallja e armëpushimit të Pashkëve.

“Në vend që të transmetohet shërbimi fetar nga Moska, fokusi duhet të jetë në presionin ndaj Moskës që të angazhohet me të vërtetë për një armëpushim të plotë. Falënderojmë të gjitha mediat, podkasterët, blogerët dhe të gjithë që ndajnë të vërtetën për atë që po ndodh”, tha Zelenskyy.