Në ditën e nisjes së gjyqit të themelit për dosjen “Partizani”, ish-kryeministri Sali Berisha ka mohuar akuzat e ngritura...
BOTA
Gjykata e Lartë e OKB-së: Pushtimi izraelit i territoreve palestineze është i paligjshëm
E.DPërditësimi i fundit 19 Korrik 2024, 19:15
IZRAEL- Gjykata e lartë e OKB-së ka thënë se pushtimi i territoreve palestineze nga Izraeli është kundër ligjit ndërkombëtar, në një opinion historik. Gjykata Ndërkombëtare e Drejtësisë (ICJ) tha se Izraeli duhet të ndalojë aktivitetin e vendbanimeve në Bregun Perëndimor të pushtuar dhe Jerusalemin Lindor dhe t'i japë fund okupimit të paligjshëm të këtyre zonave dhe Rripit të Gazës sa më shpejt të jetë e mundur. Në përgjigje, kryeministri izraelit Benjamin Netanyahu tha se gjykata kishte marrë një vendim të pa vërtetë, shkruajnë mediat e huaja.
Opinioni këshillimor i gjykatës nuk është ligjërisht i detyrueshëm, por ende ka peshë të rëndësishme politike. Kjo shënon herën e parë që GJND-ja jep një qëndrim mbi ligjshmërinë e pushtimit 57-vjeçar. GJND-ja e ka shqyrtuar këtë çështje që nga fillimi i vitit të kaluar, me kërkesë të Asamblesë së Përgjithshme të OKB-së. Gjykatës iu kërkua në mënyrë specifike të jepte pikëpamjen e saj mbi politikat dhe praktikat e Izraelit ndaj palestinezëve dhe mbi statusin ligjor të pushtimit. Duke dhënë gjetjet e gjykatës, presidenti i ICJ-së Nawaf Salam tha se kishte gjetur se prania e vazhdueshme e Izraelit në territorin e pushtuar Palestinez është e paligjshme.
"Shteti i Izraelit është i detyruar t'i japë fund pranisë së tij të paligjshme në territorin e pushtuar Palestinez sa më shpejt të jetë e mundur," tha ai.
Ai tha se tërheqja e Izraelit nga Rripi i Gazës në vitin 2005 nuk solli fundin e pushtimit të asaj zone nga Izraeli, sepse ai ende ushtron kontroll efektiv mbi të. Gjykata tha gjithashtu se Izraeli duhet të evakuojë të gjithë kolonët e tij nga Bregu Perëndimor dhe Jerusalemi Lindor dhe të paguajë dëmshpërblime për palestinezët për dëmet e shkaktuara nga okupimi. Izraeli ka ndërtuar rreth 160 vendbanime ku strehohen rreth 700,000 hebrenj në Bregun Perëndimor dhe Jerusalemin Lindor që nga viti 1967. Gjykata tha se vendbanimet ishin të paligjshme. Izraeli ka kundërshtuar vazhdimisht se ata janë kundër ligjit ndërkombëtar.
GJND-ja tha se politikat dhe praktikat e Izraelit përbëjnë aneksimin e pjesëve të mëdha të Territorit të Pushtuar Palestinez, për të cilin tha se ishte kundër ligjit ndërkombëtar, duke shtuar se Izraeli nuk kishte të drejtë për sovranitet mbi asnjë pjesë të territoreve të pushtuara. Gjithashtu Izraeli pretendon sovranitetin mbi të gjithë Jerusalemin, gjysmën lindore të të cilit e pushtoi në luftën e Lindjes së Mesme të vitit 1967. Ai e konsideron qytetin kryeqytetin e tij të pandashëm -diçka që nuk pranohet nga shumica dërrmuese e komunitetit ndërkombëtar.
