Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
BOTA
"Gjyqtarët e BE-së konstatojnë shkelje të parimeve themelore", DW: Shitja e shtetësisë nga Malta është e paligjshme
n.fPërditësimi i fundit 30 Prill 2025, 16:31
MALTË- Deri tani kushdo që investonte shumë para mund të bëhej shtetas i Maltës dhe kësisoj të jetonte dhe të punonte në të gjithë BE-në. Gjykata Evropiane e Drejtësisë e shpalli tani të paligjshme këtë praktikë.
Shitja e shtetësisë malteze është e paligjshme. Sipas Gjykatës Evropiane të Drejtësisë (GJED) të ashtuquajturat pasaporta të arta shkelin ligjin e BE-së. Një shtet anëtar nuk mund të japë shtetësinë e tij në këmbim të pagesës ose të investimeve, sepse kësisoj fitimi i shtetësisë bëhet thjesht një transaksion tregtar.
Komisioni i BE-së paditi Maltën në vitin 2022, sepse u lejonte të huajve të merrnin nënshtetësinë malteze, e cila u jepte atyre të drejtën për të jetuar dhe punuar në çdo vend të BE-së, kundrejt një pagese prej të paktën 600,000 euro.
Përveç kësaj ata që donin të merrnin nënshtetësinë duhet të blinin një pronë prej të paktën 700,000 euro ose të merrnin me qira një apartament të shtrenjtë.
Gjyqtarët e BE-së konstatojnë shkelje të parimeve themelore
Edhe pse çdo shtet anëtar i BE-së është në parim i lirë të vendosë se kundrejt cilave kushte dikush mund të marrë shtetësinë e tij, duhet të respektohet edhe ligji evropian, shpjegoi GJED-ja. Nëse fitimi i shtetësisë kthehet thjesht në biznes, kjo nuk është e drejtë.
Shtetësia duhet të bazohet tek lidhja dhe ndjenja e përkatësisë mes qytetarit dhe shtetit, tek të drejtat dhe detyrimet e ndërsjella, dhe jo thjesht tek pagesat monetare. Të gjitha shtetet e BE-së duhet ta respektojnë këtë parim themelor./DW
