Izraeli dhe SHBA-të hedhin poshtë kërkesat e Hamasit për armëpushimin: Përgjigja e tyre ishte e papranueshme

foto ilustruese

SHBA- Izraeli e konsideron përgjigjen e Hamasit ndaj propozimit të palës amerikane në lidhje me një armëpushim dhe lirimin e pengjeve si negative, ndërsa Uashingtoni e ka hedhur poshtë duke e cilësuar si "të papranueshme".

Ditën e sotme Hamasi iu përgjigj propozimit të SHBA-së. Pa deklaruar qartë nëse e pranon apo e refuzon atë, grupi kërkoi ndryshime në afatin kohor për dorëzimin e pengjeve (dhe gjithashtu të trupave të disave që nuk janë më gjallë), ndërkohë që u rikthye edhe te kërkesat e përcaktuara për një ndërprerje të plotë të armiqësive, pra armëpushim të përhershëm.

Pavarësisht se zyrtarët palestinezë thanë se iu përgjigjën pozitivisht dhe kërkuan korrigjime në propozimin e Steve Witkoff, Izraeli dhe SHBA-të deklaruan se e hedhin poshtë atë që kërkon Hamasi. Në një reagim fillestar, një zyrtar izraelit u tha gazetarëve në mënyrë anonime se qeveria e Netanyahut e sheh përgjigjen e Hamasit "në thelb si një refuzim".

Megjithatë, pavarësisht njoftimit të Hamasit, një burim i përfshirë në proces i tha Times of Israel se ndërmjetësit ende po punojnë për të zbutur disa nga ndryshimet që ka kërkuar. Ai tha gjithashtu se përgjigja e Hamasit përfshin një kërkesë që e bën më të vështirë për Izraelin të rifillojë luftimet nëse bisedimet për një armëpushim të përhershëm nuk përfundojnë deri në fund të armëpushimit 60-ditor.

Përgjigja e ndërmjetësuesit amerikan ishte se përgjigjja e Hamasit "është plotësisht e papranueshme dhe do të çojë vetëm në tërheqjen tonë".

Hamasi tha se ishte gati të lironte 10 pengje të gjalla dhe të dorëzonte 18 të vdekur. Të gjithë u rrëmbyen gjatë pushtimit të Izraelit jugor më 7 tetor 2023. Në këmbim, Hamasi kërkoi lirimin e një numri të rënë dakord të të burgosurve palestinezë të mbajtur nga Izraeli. Ky propozim, vazhdoi Hamasi, "synon arritjen e një armëpushimi të përhershëm, një tërheqje të plotë nga Rripi i Gazës dhe sigurimin e ofrimit të ndihmës për popullin dhe familjet tona në Rripin e Gazës".

Dje, të premten, Izraeli e paralajmëroi Hamasin të pranonte propozimin amerikan ose "do të shkatërrohej", siç deklaroi në mënyrë karakteristike Ministri i Mbrojtjes, Izrael Katz. Megjithatë, Izraeli ende nuk ka deklaruar shprehimisht nëse e pranon propozimin amerikan.

Çfarë propozoi Hamasi?

Hamasi kërkon që kthimi i pengjeve të bëhet në pesë faza, në vend të dy në javën e parë. Këta janë 10 pengje të gjallë dhe 18 trupa në këmbim të një numri të rënë dakord të të burgosurve palestinezë.

Burime me njohuri për çështjen, thonë se Hamasi dëshiron të lirojë katër pengje të gjallë në ditën e parë të armëpushimit 60-ditor, nga dy në ditën e 10-të dhe të 30-të, dhe në ditën e fundit të marrëveshjes do të lirojë katër pengje të tjera .

Hamasi po ofron gjithashtu të kthejë trupat e pengjeve në ditën e 30-të dhe të 50-të të armëpushimit të propozuar.

Hamasi gjithashtu propozon në propozimin e tij një armëpushim të përhershëm, një tërheqje të plotë nga Rripi i Gazës dhe sigurimin e rrjedhës së ndihmave për palestinezët.

Edhe pse plani i propozuar nga SHBA-të nuk është bërë publik, Reuters raporton se pikat kryesore të tij janë si më poshtë :

- Një armëpushim 60-ditor

- Lirimi i 28 pengjeve izraelite, të gjallë dhe të vdekur, në javën e parë dhe 30 të tjerëve sapo të hyjë në fuqi armëpushimi i përhershëm

- Lirimi i 1,236 të burgosurve palestinezë dhe mbetjeve mortore të 180 palestinezëve të vdekur

- Dërgimi i ndihmës humanitare në Gaza përmes Kombeve të Bashkuara dhe organizatave të tjera.

hamas izrael armepushim ne gaza