Ish-ministri i Jashtëm, Ditmir Bushati ka reaguar për herë të parë në lidhje me protestat masive të të rinjve dhe qyteta...
BOTA
Japonia nis misionin historik drejt Marsit, synon të sjellë mostra nga hëna Fobos në Tokë deri në vitin 2031
PiranjatPërditësimi i fundit 20 Tetor 2026, 15:43
Japonia ka lëshuar një “anije kozmike” në një udhëtim të llojit të vet drejt Marsit, ku ajo do të përpiqet të ulet në Fobos – njërin nga hënat e këtij planeti – dhe të sjellë një pjesë të tij në Tokë.
Agjencia Japoneze e Eksplorimit të Hapësirës, e cila udhëheq këtë nismë, e lëshoi “anijen kozmike” të martën, para agimit, nga kozmodromi kryesor në ishullin Tanegashima.
Zyrtarët njoftuan suksesin një orë më vonë, kur anija kozmike u shkëput, sipas planit, nga pjesa e sipërme e raketës.
Ekipi i kontrollit të fluturimit shpërtheu në duartrokitje, duke shtrënguar duart dhe përqafuar njëri-tjetrin.
Pesë agjenci hapësinore mbështesin këtë mision pesëvjeçar, i cili do të vendosë në Fobos – hënën më të madhe dhe më të afërt nga dy hënat e vogla të Marsit – një pajisje robotike për mbledhjen e mostrave, si dhe një mjet të vogël lëvizës (rover).
Misioni, që kushton 578 milionë dollarë dhe njihet si MMX (Eksplorimi i Hënave të Marsit), përqendrohet te një “anije kozmike” 5-tonëshe, e cila pritet të arrijë në Mars nga fundi i verës së ardhshme.
Ajo do të sinkronizohet me orbitën e ngushtë të Fobos-it, përpara se të lëshojë "Idefix"-in, një mjet lëvizës franko-gjerman.
Jo më i madh se një furrë me mikrovalë, "Idefix" do të zbresë në Fobos, duke u hedhur për disa minuta përpara se të ndalojë, për shkak të gravitetit jashtëzakonisht të dobët të këtij trupi qiellor.
"Ka shumë adrenalinë, shumë entuziazëm dhe shumë habi", tha astrofizikani i NASA-s, Tom Statler, i cili është i përfshirë në projekt.
Gjatë 50 viteve të fundit, NASA ka ulur nëntë “anije kozmike” në Mars, ndërsa Kina e realizoi një ulje të tillë në vitin 2021.
Megjithatë, askush nuk është përpjekur më parë të shkojë në Fobos apo në hënën tjetër, Deimosin; gjithashtu, askush nuk ka sjellë ndonjëherë mostra nga Marsi, e lëre më nga hënat e tij.
Nëse misioni rezulton i suksesshëm, pluhuri, dheu dhe shkëmbinjtë nga Fobos-i do të mbërrijnë në Tokë në vitin 2031.
Analistët besojnë se Japonia ka një avantazh, pasi ka përfunduar tashmë dy misione për sjelljen e mostrave nga asteroidët.
Fobos-i është një shkëmb me formë të çrregullt, që ngjan me një patate, me një diametër prej rreth 22 kilometrash.
Studimi i tij mund të ndihmojë në shpjegimin e mënyrës se si janë formuar hënat e Marsit – e ndoshta edhe hënat në vende të tjera të hapësirës.
