"Jemi pranë një marrëveshje për lirimin e pengjeve të Hamasit", Biden për politikën e jashtme të SHBA: Kundërshtarët tanë më të dobët se 4 vjet më parë

joe biden

SHBA- Presidenti në largim Joe Biden u përpoq të hënën të përmirësonte pasqyrën e arritjeve lidhur me politikën e jashtme dhe tha se kundërshtarët e Shteteve të Bashkuara janë tani më të dobët se kur ai mori detyrën katër vjet më parë, pavarësisht krizave globale që vazhdojnë të mbeten të pazgjidhura.

Një javë përpara marrjes së detyrës nga Presidenti i zgjedhur Donald Trump, Presidenti Biden iu drejtua diplomatëve amerikanë në Departamentin e Shtetit dhe vlerësoi lart mbështetjen e administratës së tij për Ukrainën dhe për luftërat e Izraelit në Lindjen e Mesme.

Zoti Biden tha se Shtetet e Bashkuara "po fitonin konkurrencën botërore" dhe nuk do të tejkaloheshin ekonomikisht nga Kina siç ishte parashikuar, ndërsa Rusia dhe Irani janë dobësuar nga luftërat pa përfshirjen e drejtpërdrejtë të Shteteve të Bashkuara.

“Krahasuar me katër vjet më parë, Amerika është më e fortë, aleancat tona janë më të forta, kundërshtarët dhe konkurrentët tanë janë më të dobët”, tha Presidenti Biden. "Dhe ne nuk kemi shkuar në luftë për t’i bërë të gjitha këto të mundura".

Ndërsa luftërat vazhdojnë në Ukrainë dhe Lindjen e Mesme, zyrtarët shpresojnë se një marrëveshje mes Izraelit dhe grupit militant palestinez Hamas mund të arrihet përpara se sa Joe Bideni të largohet nga Shtëpia e Bardhë më 20 janar.

Zoti Biden tha se negociatorët ishin pranë arritjes së një marrëveshjeje që do të bënte të mundur lirimin e personave që mbahen peng nga Hamasi në Rripin e Gazës dhe do t’u jepte fund luftimeve atje për të lejuar një rritje të ndihmave humanitare.

"Kaq shumë njerëz të pafajshëm janë vrarë, kaq shumë komunitete janë shkatërruar. Palestinezët meritojnë paqen, të drejtën për të vendosur të ardhmen e tyre. Izraeli meriton paqen dhe sigurinë e vërtetë. Pengjet dhe familjet e tyre meritojnë të ribashkohen", tha zoti Biden. "Dhe ne po punojmë urgjentisht për ta mbyllur këtë marrëveshje".

Presidenti Biden është përballur me kritika për ofrimin e mbështetjes diplomatike dhe me armatime për Izraelin, që kur shpërtheu konflikti i fundit izraelito-palestinez më 7 tetor 2023, kur Hamasi sulmoi Izraelin, duke vrarë 1200 njerëz dhe duke marrë rreth 250 pengje, sipas të dhënave izraelite. Sulmi ushtarak i Izraelit në Gazë ka vrarë mbi 46,000 palestinezë, sipas ministrisë së Shëndetësisë në Gazë.

Jashtë Departamentit të Shtetit, disa protestues lëshuan thirrjet “kriminel lufte” për zotin Biden.

Zoti Biden tha se ai kishte ndihmuar Izraelin të mposhtte kundërshtarët si Hamasi në Gazë dhe Hezbollahu në Liban, të dy të mbështetur nga Irani. Presidenti i Shteteve të Bashkuara po ashtu përshëndeti mbështetjen e Uashingtonit për Izraelin gjatë dy sulmeve iraniane, në vitin 2024.

“Në tërësi, Irani është më i dobët nga sa ka qenë në dekada”, shtoi ai, duke vënë në dukje rënien e qeverisë siriane të Asadit.

Presidenti Biden pranoi se shtetet autoritare Kina, Irani, Koreja e Veriut dhe Rusia tani ishin më të lidhura me njëri-tjetrin, por ai tha se kjo ndodhte më shumë për shkak të "dobësisë se sa forcës”.

"Kur Putini sulmoi Ukrainën, ai mendoi se mund të pushtonte Kievin brenda pak ditësh. E vërteta është se që kur ajo luftë filloi, unë jam i vetmi që qëndrova në qendër të Kievit, jo ai", tha zoti Biden.

Presidenti Biden mbrojti vendimin e tij për tërheqjen e trupave amerikane nga Afganistani në 2021. "Dhënia fund e luftës ishte gjëja e duhur për t'u bërë dhe unë besoj se historia do ta tregojë këtë", tha zoti Biden.

Kundërshtarët republikanë të zotit Biden, duke përfshirë zotin Trump, e kanë cilësuar vendimin si një tregues së një presidence të dështuar.

"Unë do t'ju them se çfarë ndodhi, ai veproi kaq keq me Afganistanin, ishte një siklet kaq i tmerrshëm, momenti më i sikletshëm në historinë e vendit tonë", tha zoti Trump në debatin e tij të vetëm presidencial në 2024 me zotin Biden, vetëm disa javë përpara se sa demokrati të njoftonte tërheqjen nga gara.

Presidenti Biden tha se kur hyri në Shtëpinë e Bardhë, ekspertët parashikuan se ishte e pashmangshme që Kina të kalonte Shtetet e Bashkuara në aspektin ekonomik. Tani, tha ai, kjo gjë nuk do të ndodhë kurrë. Presidenti vlerësoi se ekonomia e Shteteve të Bashkuara po përparon, por se ka ende shumë punë për të bërë./VOA

Artikuj te sugjeruar

BOTA 13 Janar22:53

Carrie Underwood do të performojë në inaugurimin e Donald Trump

SHBA- Carrie Underwood do të këndojë në inaugurimin e Donald Trump javën e ardhshme. Një zëdhën&eu...

e. d BOTA 13 Janar22:37

OSCAR/ Shpallja e nominimeve shtyhet për të dytën herë për shkak të zjarreve në Kaliforni

LOS ANGELES- Akademia e Arteve dhe Shkencave të Filmit, ka shtyrë për herë të dytë shpalljen e nominimeve të &cce...

M.B. BOTA 13 Janar22:18

Ndërhyrje të Trump në zgjedhjet e vitit 2020? Gjykatësja në SHBA i hap rrugën publikimit të raportit të Prokurorit të Posaçëm Smith për 6 janarin

SHBA- Një gjykatëse federale tha të hënën se Departamenti i Drejtësisë mund ta publikojë raportin e Prokurorit të...

E.D BOTA 13 Janar21:48

Raportohet për përparim në bisedimet për armëpushim mes Izraelit dhe Hamasit

IZRAEL- Ndërmjetësit amerikanë dhe arabë kanë bërë përparim të rëndësishëm drejt arritjes së ...

ZH.LL BOTA 13 Janar21:42

"Siguria, çështja më e rëndësishme për Europën"/ Ministrat e Mbrojtjes të pesë vendeve të NATO-s mbajnë bisedime në Varshavë për ndihmën për Ukrainën

ministrat VARSHAVË- Ministrat e Mbrojtjes nga Polonia, Franca, Italia dhe Gjermania u takuan në Varshavë të hënën për t&...

ZH.LL BOTA 13 Janar21:37

Marrëveshja në zhvillim Izrael-Hamas/ Në fazën e parë pritet të lirohen 33 pengje, palestinezët do të kthehen në Gazën veriore

IZRAEL- Hamasi pritet të lirojë 33 pengje gjatë fazës së parë të marrëveshjes së armëpushimit që po fin...

E.D BOTA 13 Janar21:19

Libani përzgjedh kandidatin për kryeministër, Hezbollahu shpreh pakënaqësinë

LIBAN- Presidenti libanez Joseph Aoun thirri Kryetarin e Gjykatës Ndërkombëtare të Drejtësisë, Nawaf Salam për ta emër...

BOTA 13 Janar21:16

Trump kërkon që SHBA të dominojë industrinë e inteligjencës artificiale

SHBA- Kompani të ndryshme të inteligjencës artificiale janë në konkurrencë për të krijuar teknologjinë e së ...

ZH.LL BOTA 13 Janar20:51

Dhoma e parë e konsumit të drogës në Mbretërinë e Bashkuar hapet zyrtarisht në Glasgow! Qendra do të ndihmojë të varurit për të përmisuar jetën e tyre

dhoma e qendres BRITANI- Dhoma e parë e konsumit të drogës është hapur zyrtarisht sot në Britani me qendër në ...

M.B. BOTA 13 Janar20:38

Deklaratat e Trump/ Disa republikanë në Dhomën e Përfaqësuesve hartojnë një projektligj për blerjen e Groenlandës

SHBA- Aleatët republikanë të Presidentit të zgjedhur Donald Trump në Dhomën e Përfaqësuesve po përpiqen të s...