Tensione janë shënuar gjatë protestës së studentëve dhe pedagogëve para Ministrisë së Arsimit, ku policia ka nd&e...
BOTA
“Kam frikë se emrat do të fshihen”, shqiptari në Greqi i vendosur për të gjetur drejtësi për të birin: Do fle çdo natë para Parlamentit
PiranjatPërditësimi i fundit 26 Tetor 2025, 20:05
Në zemër të Athinës, në Sheshin Syntagma, aty ku ishte shkruar me bojë të kuqe emri i djalit të tij, Pano Ruçi ka vendosur të qëndrojë çdo natë. Ai nuk pranon që kujtimi i 57 viktimave të tragjedisë së Tempit të fshihet, pas miratimit të amendamentit për Monumentin e Ushtarit të Panjohur.
Në një deklaratë për televizionin Mega, Ruçi shprehu shqetësimin e tij se, pas miratimit të amendamentit emrat e viktimave të Tempit, mes tyre dhe i djalit të tij, Denis Ruçit, do të fshihen.
Ai u bëri thirrje familjarëve të viktimave dhe qytetarëve që të mblidhen dhe të “luftojnë” që fëmijët e tyre të prehen të qetë.
“Ju që më mbështetët, ejani sërish në Sheshin Syntagma. Ua kemi borxh fëmijëve që humbëm”, ka thënë shqiptari për mediat greke.
Sipas tij, Monumenti i Ushtarit të Panjohur është një simbol kujtese dhe nderimi për ata që kanë humbur jetën padrejtësisht, prandaj edhe fëmijët e Tempit duhet të jenë pjesë e kësaj kujtese, jo të fshihen prej saj.
“Në vend që t’u fshijmë emrat, le të sigurohemi që tragjedi të tilla të mos përsëriten më kurrë. Kam frikë se do t’i zhdukin. Ditët e fundit janë përpjekur të përjashtojnë fëmijët tanë nga grupi ‘Deri në Fund’. Por ne nuk do të heshtim”, tha ai më tej.
Pano Ruçi e quajti këtë vendim “një akt hakmarrjeje”, duke theksuar se nuk do të ndalet: “Nga sot, do të jem çdo natë në Syntagma, pikërisht në vendin ku ishte shkruar emri i fëmijës tim me të kuqe. Do të qëndroj aty, derisa kujtimi i tyre të mos fshihet kurrë.”
Tragjedia e Tempit:
Një tren pasagjerësh plot studentë u përplas me një tren mallrash më 28 shkurt 2023, pranë grykës së Tempit në Greqinë qendrore.
Ngjarja ndodhi kur një tren pasagjerësh që po udhëtonte nga Athina për në Selanik u përplas ballë për ballë me një tren mallrash në afërsi të qytetit Tempi. Aksidenti shkaktoi vdekjen e të paktën 57 personave dhe plagosjen e dhjetëra të tjerëve.
Shumë nga viktimat ishin të rinj, përfshirë studentë që ktheheshin në universitet pas një pushimi festiv. Në mesin e të rinjve që humbën jetën në atë ditë të zezë jo vetëm për Greqinë, por dhe vendin tonë, ishin dhe 6 shqiptarë.
Klaudia Lato, Ifigjenia Micka, Erieta Molko, Ioanis Xhiollas, Denis Ruçi dhe Pavlin Bozo janë shqiptarët që humbën jetën nga kjo tragjedi e jashtëzakonshme.
Hetimet zbuluan se aksidenti ndodhi për shkak të një gabimi njerëzor dhe problemeve të thella në sistemin hekurudhor. Përgjegjësia kryesore i ra shefit të stacionit të Larisës, i cili pranoi se kishte drejtuar trenin e pasagjerëve në të njëjtin shinat me trenin e mallrave.
