Në ditën e nisjes së gjyqit të themelit për dosjen “Partizani”, ish-kryeministri Sali Berisha ka mohuar akuzat e ngritura...
BOTA
Kamala Harris siguron votat e demokratëve, zgjidhet zyrtarisht si kandidate për Presidente
S.BPërditësimi i fundit 2 Gusht 2024, 20:40
Kamala Harris
SHBA- Zëvendëspresidentja amerikane Kamala Harris ka fituar mjaft vota nga delegatët demokratë për të fituar nominimin e partisë për presidente, njoftoi të premten Kryetari i Komitetit Kombëtar Demokratik, Jaime Harrison. Harris do të bëhet gruaja e parë me ngjyrë dhe e para aziatike amerikane që do të kandidojë për postin.
Njoftimi erdhi gjatë një ngjarjeje virtuale me mbështetësit të premten. Delegatët filluan hedhjen e votave virtuale për nominimin të enjten, një proces që do të vazhdojë deri të hënën në mbrëmje.
“Jam e nderuar që jam kandidatja e supozuar demokrate për presidente e Shteteve të Bashkuara,” tha Harris. “Do ta pranoj zyrtarisht nominimin tuaj javën e ardhshme, pasi të mbyllet periudha virtuale e votimit.”
“Më vonë këtë muaj, ne do të mblidhemi në Çikago, të bashkuar si një parti, ku do të kemi një mundësi për të festuar këtë moment historik së bashku,” shtoi zëvendëspresidentja.
Harris dhe kandidati i saj për zëvendëspresident do të kalojnë javën e ardhshme duke bërë fushatë nëpër shtetet e fushëbetejës, duke filluar me një tubim të martën mbrëma në Filadelfia. Ndërsa votimi zyrtar po zhvillohet virtualisht, delegatët do të kenë një thirrje ceremoniale në konventën e Demokratëve në Çikago, e cila fillon më 19 gusht.
