Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
BOTA
Kanë ekzistuar të paktën prej dy dekadash, administrata e Presidentit Trump shpërbën 2 borde ekspertësh për të dhënat ekonomike
r.llPërditësimi i fundit 5 Mars 2025, 22:10
foto ilustruese
UASHINGTON – Administrata e Presidentit Donald Trump shpërbëri dy komisione ekspertësh që punonin me qeverinë për të hartuar statistikat ekonomike, vendim që ka mundësi të ndikojnë në cilësinë e të dhënave.
Vendimi i Sekretarit të Departamentit të Tregtisë Howard Lutnick për shpërbërjen e komisioneve hyri në fuqi më 28 shkurt dhe iu komunikua atyre të martën, përmes një e-maili dërguar njërit prej bordeve, Komisionit Federal Këshillëdhënës për Statistikat Ekonomike (FESAC), i cili ndihmonte në hartimin e të dhënave mbi inflacionin, shkallën e papunësisë dhe Prodhimin e Brendshëm Bruto (GDP).
“Sekretari i Tregtisë ka vendosur se qëllimet për të cilat u formua FESAC-u janë përmbushur dhe komisioni duhet të shpërbëhet, më 28 shkurt, 2025”. Komisioni i dytë – Komisioni Këshillëdhënës në Byronë për Analizat Ekonomike, që jepte këshilla për një kategori tjetër të të dhënave ekonomike – gjithashtu është shpërbërë.
“Ky vendim do të ndikojë në cilësinë e të dhënave ngaqë është parim thelbësor i agjencive federale statistikore që ato vazhdimisht të bëjnë përmirësime dhe të sjellin gjëra të reja”, deklaroi ish anëtarja e FESAC-ut, Erica Groshen. “Pa informacione që ofrohen në vazhdimësi dhe pa këshillat e ekspertëve jashtë agjencive të tyre, do të jetë shumë vështirë për ta që ta bëjnë këtë”.
Departamenti i Tregtisë dhe Shtëpia e Bardhë nuk iu përgjigjën të martën kërkesës për koment.
Zonja Groshen, e cila është gjithashtu ish komisionere e Byrosë për Statistikat e Punësimit (BLS), tha se FESAC-u përbëhej nga profesorë, ekonomistë nga sektori privat dhe analistët të të dhënave. Komisioni ishte i përqendruar në përmirësimin e vazhdueshëm të të dhënave ekonomike që hartoheshin nga Byroja për Statistikat e Punësimit si dhe nga agjencitë statistikore të Departamentit të Tregtisë, Byrosë së Regjistrimit të Popullsisë dhe Byrosë për Analiza Ekonomike.
Komisionet kanë ekzistuar të paktën prej dy dekadash. Shpërbërja e tyre ndodhi disa ditë pasi Sekretari Lutnick tha se do të hiqte shpenzimet qeveritare nga raporti i Prodhimit të Brendshëm Bruto, një veprim që disa ekonomistë thonë se është i pamundur dhe që ka për synim të fshehë ndikimin ekonomik të shkurtimeve të shumta të shpenzimeve dhe shkarkimeve masive nga puna, që po bën Departamenti i Efikasitetit të Qeverisë, DOGE, që udhëhiqet nga miliarderi Elon Musk./VOA
