Kryeministri Edi Rama ka publikuar një pasqyrë të protestave në disa vende, ku përfshihet edhe Shqipëria, duke krahasuar numrin e ...
BOTA
Kryeministri sllovak, Robert Fico u takua me Putinin në Moskë/ Kritikohet ashpër nga BE
m.lPërditësimi i fundit 10 Maj 2025, 07:52
RUSI- Kryeministri sllovak Robert Fico shprehu dëshirën e vendit të tij për të zhvilluar marrëdhënie "realiste" me Rusinë. Sa më sipër u tha gjatë takimit që ai pati dje, të premten me Presidentin rus Vladimir Putin në Moskë dhe pasi mori pjesë në paradën ushtarake të mbajtur në Sheshin e Kuq me rastin e 80-vjetorit të fitores ndaj Gjermanisë naziste.
Fico, i njohur për pikëpamjet e tij pro-ruse, i tha Putinit se nuk kishte "asnjë problem" të pranonte ftesën e Kremlinit për të marrë pjesë në festimet në Moskë për përfundimin e Luftës së Dytë Botërore.
"Përkundrazi, ishte një nder të pranoja këtë ftesë, të cilën e pranova me gëzim", theksoi ai në takimin e tij me presidentin rus, i cili u transmetua në televizionin shtetëror rus.
Shefja e diplomacisë evropiane, Kaya Kalas, u kishte kërkuar udhëheqësve evropianë të mos merrnin pjesë në festimet e 9 majit në Moskë, dhe Fico ishte i vetmi që e bëri këtë. Kryeministri sllovak mbërriti në Moskë pas një udhëtimi të mbushur me ngjarje, pasi vendet anëtare të BE-së ndaluan hyrjen e avionit që e mbante atë në hapësirën e tyre ajrore.
Fico komentoi: Le t’i konsiderojmë të gjitha problemet teknike të krijuara nga kolegët tanë të BE-së si një shaka fëmijërore. Si kreu i qeverisë, dua t'ju siguroj se është në interesin tim të kem marrëdhënie realiste me Federatën Ruse. Jam kundër krijimit të një perdeje të hekurt të re dhe zotohem të bëj gjithçka që të mund të shtrëngojmë duart përmes një perdeje.
Fico deklaroi gjithashtu se vendi i tij do të vërë veton ndaj planit të Brukselit për ta larguar BE-në nga gazi rus, në rast se nevojitet unanimitet për miratimin e tij. Nga ana e tij, Putin e siguroi Ficon se do të bëjë “gjithçka” që mundet për të rivendosur marrëdhëniet e Rusisë me Sllovakinë, të cilat, siç theksoi ai, “u ngrinë” për shkak të presionit perëndimor.
"Ne gjithmonë kemi pasur marrëdhënie miqësore me Sllovakinë", shtoi ai.
Ashtu si fqinji dhe aleati i tij, kryeministri hungarez Viktor Orban, Fico e ka kritikuar vazhdimisht BE-në për mënyrën se si e ka trajtuar luftën në Ukrainë, si dhe për izolimin që Brukseli i ka imponuar Rusisë.
