"Lufta" për pushtet e karteleve të drogës në Meksikë, gjenden të vdekur 19 persona, trupat e pajetë ishin futur brenda një kamioni

Viktimat

MEKSIKË- 19 persona janë gjetur të vrarë në Meksikë në një konflikt midis dy karteleve të drogës në shtetin jugor të Chiapas. Mësohet se mes viktimave janë edhe katër shtetas të Guatemalës. Brenda një kamioni me mallra janë gjetur 14 persona të vrarë me armë zjarri, dy të tjerë në kabinë, dy në rrugë dhe një tjetër në një distancë rreth 100 metra. Më parë u bë e ditur se të vdekurit ishin 20.

Incidenti ndodhi të premten e kaluar në qytetin La Concordia, disa orë me makinë nga kufiri me Guatemalën. Sipas ministrisë, hetimet e para tregojnë se bëhet fjalë për një "konflikt" midis kartelit Sinaloa, një nga më të fortët në vend, dhe një fraksioni rival të quajtur "Karteli i Chiapas dhe Guatemalës".

Autoritetet theksojnë se dy organizatat kriminale kërkojnë kontrollin e kësaj zone kufitare dhe, sipas njoftimit, u konstatua se të paktën katër nga personat e vrarë mbanin karta identifikimi të lëshuara nga qeveria e Guatemalës. Pasi u alarmuan të shtunën për praninë e trupave në një rrugë rurale, forcat e rendit zbuluan të vrarët brenda një kamioni mallrash. 

Sipas të njëjtit burim, u bënë arrestime të personave të lidhur me kontrabandën e drogës, trafikun e qenieve njerëzore dhe kontrabandën e armëve në zonën ku u zhvilluan këto ngjarje. Fundjavën e kaluar, qeveria federale urdhëroi vendosjen e 1200 trupave për të forcuar sigurinë përgjatë kufirit me Guatemalën.

meksike viktima kartele droge