Ëndrra amerikane/ Mbi 170,000 emigrantë kaluan xhunglën e rrezikshme Darien në 5 muaj në Panama, pritet të vendoset rekord i ri në vitin 2024

Darien

KOLUMBI- Pak më shumë se 170,000 emigrantë kaluan xhunglën e rrezikshme të Darien në kufirin natyror mes Kolumbisë dhe Panamanë, në pesë muajt e parë të këtij viti. Lajmin e njoftoi agjencia e imigracionit e Panamasë duke vlerësuar se një trend i tillë do të mund të vendosë një rekord të ri.

Ky numër ishte 2 për qind më i lartë se gati 167,000 që morën atë rrugë në të njëjtën periudhë të vitit të kaluar, sipas të dhënave nga Shërbimi Kombëtar i Migracionit (SNM), pasi edhe më shumë njerëz përballen me rrezikun në përpjekjen e tyre për të arritur në SHBA me shpresën se do të gjejnë një jetë më të mirë.

Vitin e kaluar pa një numër rekord kalimesh nëpër këtë rajon: më shumë se gjysmë milioni njerëz kaluan xhunglën e dendur, pavarësisht se u përballën me një sërë rreziqesh gjatë rrugës: nga rënia pre e grabitqarëve deri te vjedhjet, dhuna, abuzimi seksual dhe të qenit mall njerëzor për trafikantët, pasi zona është shkatërruar nga bandat.

Autoritetet panameze kërkuan ndihmë ndërkombëtare dhe forcuan masat e sigurisë në kufi, megjithatë numri i emigrantëve vazhdoi trajektoren e tij në rritje. Qeveria e presidentit të zgjedhur Jose Raul Molino i cili do të marrë detyrën më 1 korrik, pritet të shtyjë për masa edhe më të ashpra për të frenuar emigracionin, megjithëse ai nuk ka bërë të ditur detaje.  Molino ka njoftuar tashmë para zgjedhjeve se do të "mbyllte" xhunglën, e cila ka një sipërfaqe prej 5.75 milionë hektarësh dhe një gjatësi prej 266 kilometrash.

panama kolumbi emigrante