Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
BOTA
Nëna e tre fëmijëve helmon burrin e saj për 4 mln dollarë, në TV u shfaq si grua e pikëlluar dhe bëri libër për të
PiranjatPërditësimi i fundit 17 Mars 2026, 20:11
35-vjeçarja Cory Richins u shpall fajtore për vrasjen e bashkëshortit të saj në mars të vitit 2022, në një rast që shkaktoi tronditje, por edhe interes të madh në Shtetet e Bashkuara, pasi kombinon një krim të shëmtuar me një imazh që dukej krejtësisht i kundërt. Imazhi i nënës së tre fëmijëve dhe autores së një libri për fëmijë për menaxhimin e pikëllimit pas vdekjes së bashkëshortit të saj.
Richins u shpall fajtore për vrasjen e bashkëshortit të saj, Eric Richins, të cilin e helmoi me fentanyl, në një rast që prokurorët e përshkruan si të paramenduar dhe me një motiv të qartë financiar. Sipas vendimit, ajo e helmoi atë duke shtuar fentanyl në një pije që i dha, duke çuar në vdekjen e tij nga mbidoza.
Gjatë gjyqit, u paraqitën prova që tregonin se e pandehura kishte borxhe prej miliona dollarësh, kishte nënshkruar polica sigurimi jete për burrin e saj dhe kishte një lidhje jashtëmartesore. Prokurorët thirrën më shumë se 40 dëshmitarë, përfshirë gruan që dyshohet se i furnizoi Cory Richins drogën që ajo përdori për të vrarë burrin e saj.
Prokurorët thanë gjatë gjyqit se ajo gabimisht besonte se do të trashëgonte pasurinë e tij, me vlerë më shumë se 4 milionë dollarë , pas vdekjes së tij.
Për më shumë se një vit, Richins luajti rolin e vejushës në zi, madje shkroi një libër të titulluar "Are You With Me?", të cilin e kishte shkruar për të ndihmuar fëmijët e saj të përballonin humbjen. Librin ia dedikoi burrit të saj , të cilin e përshkroi si një "bashkëshort të mrekullueshëm dhe baba të mrekullueshëm" gjatë paraqitjeve në televizionin lokal për ta promovuar atë.
Sipas deklaratës së sherifit, Richins pagoi një kompani shkrimi librash për të shkruar librin për të. Ai shtoi se menjëherë pas arrestimit të Richins, nëna e saj e dërgoi librin në zyrën e sherifit në një pako anonime me një shënim ku thuhej se ajo ishte shembull i "një Courie të vërtetë, një gruaje të përkushtuar dhe një nëne adhuruese".
Prokurorët u treguan gjithashtu anëtarëve të jurisë fragmente nga një letër e gjetur në qelinë e Richins, të cilat sipas tyre dukeshin se përshkruanin dëshminë e nënës dhe vëllait të saj. Në letrën gjashtëfaqëshe, Richins i udhëzoi vëllait të saj t'i tregonte ish-avokatit të saj se Eric Richins i kishte rrëfyer atij se kishte siguruar fentanil nga Meksika dhe ishte "i dehur çdo natë". /PiranjatNews/
