Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
BOTA
Netanyahu viziton forcat izraelite në Rafah, ndërsa ministri i ekstremit të djathtë merr pjesë në vendin e shenjtë të Jerusalemit
E.DPërditësimi i fundit 18 Korrik 2024, 18:32
RAFAH- Kryeministri i Izraelit, Benjamin Netanyahu, ka realizuar një vizitë të paparalajmëruar në jug të Gazës, disa ditë para se të mbajë një fjalim para Kongresit amerikan. Vizita e trupave izraelite në Rafah u bë publike vetëm disa orë pasi ministri izraelit i Sigurisë Kombëtare, Itamar Ben-Gvir, politikan i ekstremit të djathtë, vizitoi vendet e shenjta në Jerusalem.
Kjo vizitë e Ben-Gvirit kërcënon që të pengojë bisedimet që kanë për synim arritjen e një marrëveshjeje armëpushimi për luftën 9-mujore mes Izraelit dhe Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian. Negociatorët izraelitë të mërkurën arritën në Kajro për të punuar në eliminimin e dallimeve mes Izraelit dhe Hamasit sa i përket marrëveshjes për armëpushim.
Zyra e Netanyahut bëri publike vizitën e kryeministrit izraelit në Rafah, vetëm pasi ai e kishte përfunduar vizitën në këtë qytet të shkatërruar nga lufta në Gazë. Kjo zyrë tha se më vonë do të japë detaje të tjera për vizitën në jug të Gazës. Forcat izraelite pushtuan Rafahun në fillim të majit, duke detyruar shumicën e 2 milionë personave që po strehoheshin aty, që të largohen.
