Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
BOTA
Një automjeti me targa diplomatike bullgare i vihet zjarri në Shkup, Sofja: Akt agresioni!
PiranjatPërditësimi i fundit 15 Qershor 2026, 17:43
Një person i paidentifikuar i vuri flakën një automjeti me targa diplomatike bullgare, të parkuar pranë Ambasadës së Bullgarisë në Shkup, në mesditë. Zjarri dëmtoi edhe një automjet të dytë të parkuar aty pranë, gjithashtu me targa diplomatike bullgare.
Policia e Maqedonisë së Veriut njoftoi se po zhvillon hetime për identifikimin e autorit. Sipas mediave në Shkup, dyshohet se bëhet fjalë për një person të ri në moshë, identiteti i të cilit ende nuk është bërë i ditur.
Qeveria e Maqedonisë së Veriut e dënoi ashpër incidentin
“Qeveria dënon fuqishëm aktin e vandalizmit dhe zjarrvënien e papranueshme të automjeteve diplomatike në zonën pranë Ambasadës së Republikës së Bullgarisë në Shkup. Veprime të tilla përbëjnë një sulm ndaj parimeve të sigurisë, marrëdhënieve diplomatike dhe të drejtës ndërkombëtare dhe nuk kanë vend në një shtet demokratik.
Si qeveri, duam të dërgojmë një mesazh të qartë se çdo përpjekje për të provokuar tensione, për të nxitur urrejtje ose për të cenuar sigurinë do të ndëshkohet me ashpërsinë më të madhe”, thuhet në deklaratën e qeverisë së Maqedonisë së Veriut.
Kujtojmë se në janar të vitit të kaluar, një shtetas i Maqedonisë së Veriut theu xhamin e hyrjes kryesore të Ambasadës së Bullgarisë në Shkup. Më herët janë regjistruar edhe sulme ndaj qendrave kulturore bullgare në Manastir dhe Ohër.
Marrëdhëniet mes Maqedonisë së Veriut dhe Bullgarisë kanë mbetur të tensionuara vitet e fundit. Tensionet arritën kulmin pasi Sofja vendosi veto ndaj nisjes së negociatave të anëtarësimit të Shkupit në Bashkimin Evropian.
Bullgaria bllokoi procesin e integrimit të Maqedonisë së Veriut në vitin 2020, duke argumentuar se ekzistonin mosmarrëveshje të pazgjidhura lidhur me historinë, gjuhën dhe interpretimin e trashëgimisë së përbashkët historike mes dy vendeve.
Megjithatë, në verën e vitit 2022, qeveritë e atëhershme të dy vendeve pranuan një propozim kompromisi të Bashkimit Evropian, i cili parashikonte heqjen e vetos bullgare me kusht që Maqedonia e Veriut të ndryshonte Kushtetutën për të përfshirë pakicën bullgare që jeton në vend.
Megjithatë, qeveria e mëparshme e qendrës së majtë në Shkup nuk arriti të siguronte shumicën prej dy të tretash në Parlament, e nevojshme për miratimin e ndryshimeve kushtetuese, për shkak të kundërshtimit nga partia VMRO-DPMNE, aktualisht në pushtet nën drejtimin e kryeministrit Hristijan Mickoski.
Ky i fundit e konsideron propozimin të dëmshëm për interesat kombëtare të vendit dhe ka deklaruar se nuk do të mbështesë ndryshime të tilla kushtetuese.
Sofja reagon ndaj zjarrvënies së automjeteve
Ministria e Jashtme e Bullgarisë dënoi ashpër zjarrvënien e automjeteve me targa diplomatike bullgare pranë Ambasadës së Bullgarisë në Shkup.
“Ky akt i hapur agresioni rrezikoi shëndetin dhe jetën e punonjësve të ambasadës sonë në Shkup. Pa ndërhyrjen e menjëhershme të konsullit bullgar me një fikës zjarri, pasojat e këtij akti të qëllimshëm mund të kishin qenë shumë më të rënda”, thuhet në deklaratën e ministrisë.
“Ne kërkojmë zbardhjen e menjëhershme të ngjarjes dhe vendosjen e drejtësisë. Ky sulm i fundit kundër Bullgarisë dhe bullgarëve është rezultat i retorikës agresive politike, nxitjes së urrejtjes dhe mungesës së reagimit të duhur institucional ndaj incidenteve të mëparshme të ngjashme.
Shteti bullgar do të vazhdojë të përdorë të gjitha mekanizmat në dispozicion për t’iu kundërvënë përpjekjeve për krijimin e një atmosfere frike ndaj bullgarëve në Republikën e Maqedonisë së Veriut”, përfundon deklarata. /PiranjatNews/
