OKB: Më shumë se 600 fëmijë janë vrarë në Ukrainë që nga fillimi i luftës

Foyo ilustruese

UKRAINË - Disa orë pas vendimit të administratës amerikane për të dhënë miratimin për përdorimin e armëve amerikane kundër objektivave ushtarake brenda territorit rus në kufirin verilindor Ukrainë-Rusi,  Koordinatorja Humanitare e OKB-së  për Ukrainën, Denise Brown, tha se sulmi i fundit rus në Kharkiv vret dhe plagos civilë.

"Kolegët tanë humanitarë raportojnë se sulmet e përsëritura në të njëjtën zonë kanë ndikuar gjithashtu në përpjekjet e shpëtimit," tha Brown.

Punonjësit e ndihmës ofruan ndihmë thelbësore, duke përfshirë materiale riparimi emergjent, ushqim dhe pije freskuese për të prekurit, si dhe mbështetje psikologjike. Autoritetet lokale raportuan se më shumë se 11,000 njerëz u evakuuan nga rajoni i Kharkiv për shkak të luftimeve të ashpra pranë kufirit me Federatën Ruse.

Brown theksoi se përshkallëzimi i armiqësive në Kharkiv vazhdon të shkatërrojë jetët e familjeve, duke i bërë përpjekjet për ndihmën humanitare edhe më kritike dhe të vështira. Sipas shifrave të verifikuara nga Zyra e OKB-së për të Drejtat e Njeriut, më shumë se  600 fëmijë janë vrarë në të gjithë Ukrainën që nga fillimi i luftës në shkurt 2022, ndërsa më shumë se 1400 janë plagosur.

"Megjithatë, numri aktual ka të ngjarë të jetë shumë më i lartë," thanë burime diplomatike në OKB. “Në komunitetet e vijës së parë, fëmijët kanë kaluar rreth katër deri në shtatë muaj në strehimoret e bombave gjatë dy viteve të fundit”, theksojnë të njëjtat burime.

“Me më shumë se 200 shkolla të dëmtuara apo të shkatërruara në vitin 2024, si dhe me zhvendosjen e fëmijëve, arsimi në vend është nën kërcënim. Qasja në shëndet dhe vaksinim është prekur gjithashtu rëndë”, shtoi zonja Brown.

okb ukraine