Osmani dekoron të mbijetuarit e dhunës seksuale gjatë luftës me medaljen “Nderi i Republikës së Kosovës": Historia nuk do t'iu harrojë!

KOSOVË- Presidentja e Kosovës, Vjosa Osmani ka dekoruar me medaljen “Nderi i Republikës së Kosovës" të mbijetuarit e dhunës seksuale gjatë luftës. Në një ceremoni të organizuar në Presidencë me këtë medalje u nderuan Vasfije Krasniqi-Goodman, Shyrete Tahiri- Sylejmani dhe Ramadan Nishori, të mbijetuar të dhunës seksuale që kanë folur publikisht për mizoritë që kanë përjetuar nga forcat serbe gjatë luftës.

Osmani vlerësoi guximin e tyre për të dëshmuar dhe ndarë me publikun përvojat e rënda, duke theksuar se rrëfimet e tyre janë të një rëndësie të jashtëzakonshme për drejtësinë dhe të vërtetën historike të Kosovës. Ajo tha se ata janë dëshmia e gjallë dhe shtylla e luftës për drejtësi.

“Ka momente ku fjalët nuk mjaftojnë për të shprehur mirënjohjen, siç ka edhe njerëz që me guximin e tyre të lënë pa fjalë. Sot jemi këtu për t’iu përulur me respektin më të thellë përballë tre individëve që janë më shumë se thjesht individë, sepse me dhimbjen e tyre kanë ndriçuar rrugën e drejtë së vërtetës, drejtësisë dhe shpresës. Ju jeni zëri që keni zgjedhur dinjitetin, jeni zëri i të mbijetuarve që kanë zgjedhur heshtjen. Ky është një premtim i gjallë se historia nuk do t’i harrojë”, tha ajo.

osmani te mbijetuar te dhunes seksuale gjate luftes ne kosove