PAMJE TË RËNDA/ Publikohet momenti i sulmit të përgjakshëm të 19-vjeçarit palestinez në Tel Aviv (VIDEO)

Pamje nga sulmi

IZRAEL - Janë publikuar pamjet nga ngjarja e rëndë që ndodhi pasditen e kësaj të shtune në një qendër tregtare në Tel Aviv, ku një 19-vjeçar palestinez shkoi në një kafene dhe sulmoi me thikë një 30-vjeçar i cili ndodhet në spital në gjendje kritike për jetën.

Siç mund të shihet dhe në videot e mëposhtme të publikuar në rrjetet sociale, i riu nga Palestina afrohet me qetësi dhe fillon të sulmojë me thikë grupin e të rinjve që ishin duke konsumuar kafe, dhe si pasojë e goditjeve ka marrë plagë të rënda një 30-vjeçar nga Izraeli.

Por pak minuta më vonë sulmuesi palestinez vritet me armë zjarri nga një shtetas izraelit që ndodhej në vendngjarje, siç duket edhe në pamjet e mëposhtme. Ky incident vjen vetëm disa orë para hyrjes në fuqi të armëpushimit të rënë dakord mes Hamasit dhe Izraelit. Autoritetet izraelite kanë nisur hetimet, për të përcaktuar nëse bëhet fjalë për sulm terrorist apo vepër kriminale.

Lidhur me situatën Izrael-Hamas, pak orë më parë, kryeministri i Izraelit, Benjamin Netanayahu, paralajmëroi se marrëveshja e armëpushimit është në rrezik, pasi vendi nuk do të vazhdojë përpara me të, derisa Hamasi të nxjerrë një listë me 33 pengjet që do të lirohen. 33 nga 98 pengjet e mbetura izraelitë të rrëmbyer nga Hamasi pritet të lirohen në këtë fazë. Në këmbim, Izraeli do të lirojë rreth 2000 palestinezë që aktualisht janë të ndaluar nëpër burgje të shumta.

incident izrael