Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
BOTA
Rrjeti telefonik në Spanjë pëson kolaps disa javë pas ndërprerjes së energjisë elektrike, numri i emergjencës 112 jashtë shërbimit për disa orë
n.fPërditësimi i fundit 20 Maj 2025, 12:39
SPANJË- Një krizë e re infrastrukturore në Spanjë po shkakton ndërprerje në të gjithë rrjetin e telefonisë celulare, vetëm pak javë pas ndërprerjes së zgjatur të energjisë elektrike që paralizoi vendin dhe Portugalinë.
Dështimi ndodhi për shkak të një përmirësimi të rrjetit të Telefónica-s dhe preku kryesisht telefoninë fikse, por edhe shërbimet zanore mobile, duke lënë jashtë funksionit shërbime kritike siç është numri i emergjencës 112 në rajone si Aragona, Extremadura, Vendi Bask dhe Valencia.
Siç deklaroi një zëdhënës i Telefónica-s ata kryen përmirësime të rrjetit që prekën shërbime specifike për disa kompani. Ai shtoi se po punojnë për restaurimin. Disa zona raportuan rivendosje graduale të rrjetit gjatë mëngjesit.
Sipas faqes spanjolle të monitorimit Downdetector dhe gazetës El País, problemet filluan rreth orës 2 të mëngjesit. Nga raportet, 72% flisnin për një ndërprerje të plotë të shërbimeve, 18% për mungesë sinjali dhe 10% për një "pamundësi totale për të komunikuar".
Autoritetet lokale nxituan të njoftonin numra alternativë të urgjencës, pasi 112 nuk ishte i disponueshëm për orë të tëra. Shërbimet u rivendosën gradualisht në rajone të tilla si Valencia, Aragona, Andalusia dhe La Rioja, megjithatë në disa rajone, siç është Vendi Bask, ende vërehen ndërprerje të rastësishme.
Ministria e Transformimit Dixhital e Spanjës njoftoi se po monitoron nga afër situatën dhe ka kërkuar të dhëna të sakta dhe një orar restaurimi nga Telefónica. Incidenti i shtohet një serie keqfunksionimesh në infrastrukturën kritike të vendit. Në fund të prillit, një ndërprerje e paprecedentë e energjisë elektrike la miliona qytetarë në Spanjë dhe Portugali në errësirë për gati 23 orë, duke prekur semaforët, ndriçimin, sistemet e pagesave dhe ekranet e informacionit.
