Rusia përdor Bitcoin në tregtinë ndërkombëtare për shmangien e sanksioneve nga Perëndimi

bitcoin

MOSKË- Kompanitë ruse kanë filluar të përdorin bitcoin dhe monedha të tjera dixhitale në pagesat ndërkombëtare pas ndryshimeve legjislative që lejuan një përdorim të tillë për të kundërshtuar sanksionet perëndimore.

Sanksionet kanë komplikuar tregtinë e Rusisë me partnerët e saj kryesorë si Kina apo Turqia, pasi bankat lokale janë jashtëzakonisht të kujdesshme me transaksionet e lidhura me Rusinë për të shmangur shqyrtimin nga rregullatorët perëndimorë.

Këtë vit, Rusia lejoi përdorimin e kriptomonedhave në tregtinë e jashtme dhe ka ndërmarrë hapa për ta bërë të ligjshme përdorimin e kriptomonedhave, përfshirë bitcoin. Rusia është një nga liderët globalë në minierat e bitcoin.

“Si pjesë e regjimit eksperimental, është e mundur të përdoren bitcoin këtu në Rusi (në transaksionet e tregtisë së jashtme),” , tha Ministri i Financave Anton Siluanov.

"Të tilla transaksione po ndodhin tashmë. Ne besojmë se ato duhet të zgjerohen dhe zhvillohen më tej. Kam besim se kjo do të ndodhë vitin e ardhshëm," tha ai, duke shtuar se pagesat ndërkombëtare me monedhat dixhitale përfaqësojnë të ardhmen.

Në fillim të këtij muaji, presidenti Vladimir Putin tha se administrata aktuale amerikane po minon rolin e dollarit amerikan si monedhë rezervë duke e përdorur atë për qëllime politike dhe duke detyruar shumë vende të kthehen në asete alternative.

rusi bitcoin