Kryetari i Partisë Demokratike, Sali Berisha, ka folur për mediat para Kuvendit, ku ka kundërshtuar mënyrën se si, sipas tij, po proc...
BOTA
Rutte siguron Trumpin: Aleatët e NATO-s do të qëndrojnë pranë SHBA-së. Më trishton ideja nëse mendon të kundërtën
PiranjatPërditësimi i fundit 21 Janar 2026, 23:09
Sekretari i Përgjithshëm i NATO-s , Mark Rutte, e siguroi Donald Trumpin në margjinat e Forumit Ekonomik Botëror në Davos sot se aleatët evropianë “do të qëndrojnë pranë” Shteteve të Bashkuara në rast të një sulmi, pas dyshimeve të shprehura nga presidenti amerikan.
“Mund të jeni absolutisht të sigurt se nëse Shtetet e Bashkuara sulmohen ndonjëherë, aleatët tuaj do të qëndrojnë pranë jush. Kjo është një garanci absolute”, tha Rutte para takimit të tyre.
“Dua vërtet t’jua them këtë, sepse është e rëndësishme. Më trishton nëse mendoni se nuk është kështu”, vazhdoi sekretari i përgjithshëm i NATO-s, duke përmendur si shembull ndërhyrjen në Afganistan pas sulmeve të 11 shtatorit 2001.
Donald Trump tha më parë këtë muaj se “dyshonte” se aleatët e NATO-s “do të ishin aty për ne nëse do të kishim vërtet nevojë për ta”. “Ne do të jemi gjithmonë aty për NATO-n, edhe nëse ajo nuk është aty për ne”, shtoi ai.
Në fund të takimit të tyre sot, presidenti amerikan tha në një mesazh të postuar në platformën e tij Truth Social se kishte hartuar “kornizën e një marrëveshjeje të ardhshme” për Groenlandën me shefin e NATO-s.
Ndërkohë, një zëdhënës i NATO-s tha se Sekretari i Përgjithshëm Rutte pati një takim shumë produktiv me Presidentin Trump, gjatë të cilit ata diskutuan rëndësinë kritike të sigurisë në rajonin e Arktikut për të gjithë aleatët. Disa orë më parë, gjatë fjalimit të tij në Davos, ai përjashtoi për herë të parë përdorimin e forcës ushtarake për të marrë kontrollin e Grenlandës, por bëri thirrje për "negociata të drejtpërdrejta" për blerjen e saj nga Shtetet e Bashkuara.
