Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
BOTA
Sekretari amerikan i Shtetit, Rubio zhvillon takim me ministrin e Jashtëm të Maqedonisë së Veriut, ja çfarë u bisedua mes tyre
r.llPërditësimi i fundit 29 Maj 2025, 21:11
takimi
SHKUP- Sekretari amerikan i Shtetit, Marco Rubio, është takuar në Uashington me ministrin për Punë të Jashtme dhe Tregti të Jashtme të Maqedonisë së Veriut, Timço Mucunski, me të cilin ka biseduar për raportet dypalëshe dhe tregtinë.
Takimi, sipas Departamentit amerikan të Shtetit, vuri në pah “raportin e fortë mes SHBA-së dhe Maqedonisë së Veriut dhe theksoi interesat e përbashkët në stabilitetin rajonal, bashkëpunimin ekonomik dhe NATO”.
DASH tha po ashtu se dy kryediplomatët kanë biseduar për mundësitë e zgjerimit të bashkëpunimit ekonomik përfshirë “tregtinë dhe investimet”.
Ndërkaq, Mucunski tha se në takimin në Uashington me Rubion u konfirmua bashkëpunimi mes dy shteteve, që sipas tij, është i bazuar mbi vlera të përbashkëta, “interesa politike dhe miqësi të kamotshme”.
“Shpreha përkushtimin e Qeverisë maqedonase për të avancuar dialogun politik me SHBA-në, si dhe përkushtimin konkret për të institucionalizuar partneritetin strategjik përmes zbatimit të Planit të përbashkët të Veprimit”, shkroi ai në Facebook.
Uashingtoni dhe Shkupi më 2022 thelluan raportet me nisjen e dialogut strategjik, që fokusohet në thellimin e partneritetit dypalësh.
Mucunski tha se gjatë takimit me Rubion është kanë biseduar edhe për raportet tregtare dhe uljen e tarifave, por edhe “nisjen e procesit të nënshkrimit të një marrëveshjeje për tregti të lirë”.
Maqedonia e Veriut ishte në mesin e shteteve që u goditën nga tarifa bazë prej 10 për qind dhe me një tarifë shtesë prej 33 për qind për importet maqedonase. Trump shpalli këto tarifa në prill të këtij viti.
“Në këtë drejtim, theksova gatishmërinë e Qeverisë maqedonase për të promovuar bashkëpunim ekonomik, tërheqjen e investimeve amerikane dhe rritjen e pranisë të kompanive amerikane në shtetin tonë”, tha ai.
SHBA-ja kërkon që të arrijë marrëveshje të posaçme për tregtinë e lirë me shtetet që kanë suficit tregtar me Uashingtonin./REL
