Shkelje e sigurisë së qeverisë/ Pas denoncimit të "gjuetisë së shtrigave", Trump njofton se kryeredaktori i 'The Atlantic' do ta marrë në intervistë: Presidenti më i rëndësishëm i shekullit

SHBA- Donald Trump njoftoi se do t'i japë sot një intervistë "për kuriozitet" kryeredaktorit të revistës The Atlantic, pak javë pas zbulimeve të këtij të fundit për një shkelje të sigurisë së qeverisë, zbulime që presidenti amerikan i denoncoi si "gjueti shtrigash".

Presidenti amerikan tha në një postim në platformën e tij "Truth Social" se do t'i jepte intervistën gazetarit Jeffrey Goldberg për të parë nëse The Atlantic mund të jetë i sinqertë dhe mund të shkruajë një artikull të drejtë për Trump.

“Artikulli që do të shkruajnë, siç u kanë thënë ekipeve të mia, do të titullohet “Presidenti më i rëndësishëm i këtij shekulli”, shtoi Donald Trump, pa specifikuar se kur do të publikohet.

"Më vonë sot do të takohem me Jeffrey Goldberg, redaktorin e revistës The Atlantic dhe përgjegjës për shumë artikuj imagjinar rreth meje, duke përfshirë artikullin e rremë Suckers and Losers dhe SignalGate, me të cilat ai pati disi më shumë "sukses". Përfaqësuesve të mi u është thënë se do të titullohen "Presidenti më i rëndësishëm i këtij shekulli", tha presidenti amerikan në postimin e tij. 

Në fund të marsit, këshilltari i sigurisë kombëtare i Shtëpisë së Bardhë, Mike Waltz, shtoi aksidentalisht Jeffrey Goldberg në një grup bisedash të Signal rreth sulmeve të afërta kundër rebelëve Houthi të Jemenit, ku përfshiheshin zyrtarë të lartë amerikanë, duke përfshirë Sekretarin e Mbrojtjes, Zëvendës Presidentin, madje edhe krerët e agjencive të inteligjencës dhe CIA-s.

Përballë skandalit, Shtëpia e Bardhë u përpoq të minimizonte zbulimet e The Atlantic dhe të dëmtonte besueshmërinë e Goldberg. Duke njoftuar këtë intervistë sot, Trump akuzoi kryeredaktorin e revistës se qëndron pas shumë historish fantastike rreth tij. Miliarderi republikan përmendi një polemikë që daton që nga mandati i tij i parë dhe të cilin ai vazhdon ta denoncojë si një mashtrim nga revista.

Në vitin 2018, Trump refuzoi të vizitonte, siç ishte planifikuar, një varrezë në Francë për ushtarët amerikanë që kishin luftuar në Luftën e Parë Botërore, zyrtarisht për shkak të kushteve të këqija të motit që do të kishin penguar një udhëtim me helikopter. Por, sipas dëshmive të cituara nga The Atlantic, ai kishte frikë se shiu do t'i prishte flokët. Dhe, sipas revistës, ai kishte thënë: Pse duhet të shkoj në këto varreza? Është plot me “humbtarë”, dështime.

donald trump