"Sonte bëj tifo për Serbinë"/ Dritan Abazoviç flet pas deklaratës befasuese: Mbështes politikën paqësore! Kam simpati edhe për skuadra të tjera të rajonit

Dritan Abazoviç

GJERMANI- Ish-kryeministri shqiptar i Malit të Zi, Dritan Abazoviç ka folur ditën e sotme në lidhje me videon e cila u bë virale ku ai shprehet se do të bëjë tifo për Serbinë në përballjen me Anglinë. Në një intervistë për "Euronews Albania" Abazoviç është shprehur se mbështet të gjitha skuadrat e rajonit.

Ai shtoi se siç ka ardhur të mbështesë Shqipërinë, duke qenë se mbështet një politikë paqësore, ka simpati edhe për skuadra të tjera të rajonit. Ai shtoi se shpreson që në një kampionat tjetër të jetë edhe Mali i Zi, Bosnja apo Kosova. 

“Unë kam ardhur në Dortmund për të parë Shqipërinë. Gjithashtu e kam shfrytëzuar rastin duke qenë se kemi mbërritur në Gjermani, shkuam dhe në ndeshjen mes Serbisë dhe Anglisë. Në të ardhmen do jemi dhe në ndeshjen mes Kroacisë dhe Italisë. Ashtu sikurse kam ardhur të mbështet Shqipërinë, duke qenë se mbështet një politikë paqësore, kam simpati edhe për skuadra të tjera të rajonit. Këtë moment vetëm Serbia dhe Kroacia janë këtu, por shpresoj në një kampionat tjetër do të jetë Mali i Zi, Bosnja apo Kosova. Ai është qëllimi i asaj deklarate”, tha Abazoviç.

Abazoviç sqaroi se në televizionin serb ka thënë se ka shkuar në Gjermani për të mbështetur Shqipërinë dhe është shprehur se në ndeshjen Angli-Serbi, mbështet më shumë këta të fundit.

“Për televizionin shtetëror të Serbisë kam thënë se kam ardhur të mbështes Shqipërinë, por gjithashtu kundër Anglisë kam tifozllëk më të fortë ndaj Serbisë. I uroj sukses dhe ekipeve të tjera në këtë kompeticion”, tha ai.

dritan abazoviç serbia euro 2024