Sindikata e Punonjësve të Universiteteve të Shqipërisë (SPUSH) i është bashkuar reagimeve ndaj dhunës policore ndaj st...
BOTA
"Sot Angelusi pa Atin e Shenjtë"/ Papa Francesku kaloi natë të qetë, por gjendja e tij mbetet kritike
E.DPërditësimi i fundit 23 Shkurt 2025, 13:28
ROMË- Zyra e Shtypit e Vatikanit njofton se Papa Françesku ka kaluar një natë të qetë dhe ka pushuar, por gjendja e tij vazhdon të jetë kritike. I shtruar që nga e premtja e javës së kaluar në spitalin Gemelli për shkak të një bronkiti që u shndërrua në pneumoni bilaterale, Papa Françesku dje pësoi një përkeqësim.
"Analizat e gjakut të kryera dje gjithashtu treguan një ulje të trombociteve, e shoqëruar me anemi, që kërkoi administrimin e transfuzioneve të gjakut. Buletini vijonte duke theksuar se Papa vazhdon të jetë i vetëdijshëm dhe e ka kaluar ditën ulur në kolltuk, megjithëse në gjendje më të rënduar se një ditë më parë. Gjendja e tij mbetet kritike dhe, siç u shpjegua dje, ai ende nuk është jashtë rrezikut," thuhet në deklaratë.
Papa u shtrua për herë të parë në spital më 14 shkurt pasi pati vështirësi në frymëmarrje për disa ditë. Gjatë 12 viteve të tij si udhëheqës i kishës katolike romake, Papa është shtruar në spital disa herë, duke përfshirë në mars 2023, kur ai kaloi tre netë në spital.
Papa nuk do ta kryesojë lutjen e Engjëllit të Zotit këtë të dielë. Këtë mëngjes në Shën Pjetër, monsinjor Rino Fisichella do të kryesojë në vend të Papës meshën e parashikuar për Jubileun e diakonëve. Përgjegjësi i Vatikanit për Vitin e Shenjtë do të lexojë homelinë e përgatitur ditët e fundit nga Papa. Gjithashtu, teksti i lutjes së zakonshme të Angelusit të së dielës do të jetë ai i përgatitur nga Papa Françesku.
