Ekziston mundësia e një takimi me Presidentin e Shteteve të Bashkuara të Amerikës, Donald Trump, në Kinë, tha sot President...
BOTA
Spanjë, ish-ministri i Transporteve dënohet me 24 vite burg. Ja akuzat e ngritura ndaj tij
PiranjatPërditësimi i fundit 22 Qershor 2026, 18:44
Një gjykatë në Spanjë ka dënuar me 24 vite burg ish-ministrin e transportit dhe bashkëpunëtorin e ngushtë të kryeministrit Pedro Sanchez, Jose Luis Abalos, për korrupsion, në një vendim që pritet të tronditë fort qeverinë socialiste.
Abalos u shpall fajtor për përfshirje në organizatë kriminale, ryshfet, përvetësim fondesh publike dhe ndikim të paligjshëm. Bashkë me të, gjykata dënoi edhe ish-këshilltarin e tij, Koldo Garcia, me 19 vite burg për të njëjtat akuza.
Sipas hetimeve, dy zyrtarët kanë përfituar ryshfete në këmbim të dhënies së kontratave publike me vlerë miliona euro për furnizime sanitare gjatë pandemisë së Covid-19.
Në qendër të skandalit është edhe biznesmeni Victor de Aldama, i cili pranoi përfshirjen në skemë. Ai u dënua me 4 vite e gjysmë burg, por për shkak të bashkëpunimit me drejtësinë, dënimi i tij u pezullua.
Ky zhvillim vjen në një moment të vështirë për kryeministrin Pedro Sanchez, i cili përballet me një seri hetimesh për korrupsion që prekin edhe rrethin e tij familjar dhe politik.
Gjykata theksoi në vendim se korrupsioni ka sjellë “një përkeqësim serioz të besimit publik në sistemin politik”, duke minuar funksionimin demokratik të shtetit.
Abalos konsiderohej një nga njerëzit kyç në ngritjen e Sanchez në pushtet në vitin 2018 dhe një figurë e rëndësishme e Partisë Socialiste.
Skandali u thellua edhe më tej pas publikimit të përgjimeve të bisedave private mes të akuzuarve, ku përmenden para dhe prostituta, duke dëmtuar imazhin e socialistëve, të cilët tradicionalisht kanë mbrojtur të drejtat e grave.
Gjatë procesit gjyqësor, Aldama pretendoi se vetë Sanchez ishte në krye të rrjetit kriminal dhe se partia në pushtet kishte përfituar nga financime të paligjshme. Kryeministri i ka mohuar kategorikisht akuzat, duke deklaruar se nuk ka asnjë lidhje me veprimtarinë e të dënuarve.
Opozita kërkon dorëheqjen: “Fundi i rrugës”
Menjëherë pas vendimit, lideri i opozitës, Alberto Nunez Feijoo, kërkoi dorëheqjen e Sanchez.
“Me çfarë legjitimiteti mund të qëndrojë në pushtet? Asnjë. Ky është fundi i rrugës”, deklaroi ai, duke theksuar se qeveria nuk ka arritur të miratojë as buxhetin.
Sanchez, i njohur për qëndrueshmërinë e tij në situata të vështira, ka refuzuar deri tani të japë dorëheqjen apo të shpallë zgjedhje të parakohshme.
Ndërkohë, presioni ndaj qeverisë është shtuar edhe nga hetimet ndaj bashkëshortes së tij, Begona Gomez, dhe vëllait, David Sanchez.
Gomez pritet të dalë në gjyq me juri për dyshime se ka përfituar nga pozicioni i saj për interesa private, ndërsa ndaj saj është vendosur edhe ndalimi i daljes jashtë vendit. Nga ana tjetër, David Sanchez po gjykohet për përfitim të një posti publik në mënyrë preferenciale.
Në të njëjtën linjë, edhe ish-kryeministri Jose Luis Rodriguez Zapatero është vënë nën hetim për ndikim të paligjshëm në një çështje që lidhet me një kompani ajrore.
Pavarësisht situatës, Sanchez i ka cilësuar të gjitha akuzat si të motivuara politikisht dhe pritet të japë sqarime në Parlament në ditët në vijim.
