Kreu i Partisë Demokratike, Sali Berisha, në një dalje për mediat pas mbledhjes së grupit parlamentar demokrat, ka sulmuar qeverin&eu...
BOTA
Tensionet/ Erdogan ofrohet që të bëjë ndërmjetësin mes Uashingtonit dhe Tehranit!
PiranjatPërditësimi i fundit 30 Janar 2026, 15:06
Presidenti turk, Recep Tayyip Erdogan, i propozoi sot homologut të tij iranian, Masoud Pezeshkian, të luajë rolin e “ndërmjetësit” midis Teheranit dhe Uashingtonit, ndërsa tensionet midis SHBA-së dhe Iranit përshkallëzohen me kërcënime për ndërhyrje ushtarake amerikane dhe përgjigje të menjëhershme iraniane.
“Gjatë bisedës së tyre telefonike, Presidenti Erdogan theksoi se Turqia është e gatshme të luajë rolin e ndërmjetësit midis Iranit dhe SHBA-së me qëllim uljen e tensionit dhe zgjidhjen e problemeve”, tha presidenca turke në një deklaratë.
Nga ana e tij, Pezeshkian vlerësoi se Uashingtoni duhet të ndalojë kërcënimet për ndërhyrje ushtarake në Iran në mënyrë që t’i japë një shans diplomacisë, theksoi presidenca iraniane.
“Suksesi i çdo iniciative diplomatike varet nga vullneti i mirë i palëve të interesuara dhe nga abstenimi nga lëvizjet dhe veprimet armiqësore dhe kërcënuese në rajon”, vuri në dukje Pezeshkian gjatë bisedës së tij me Erdoganin.
Sipas shtypit turk, presidenti turk po shtyn gjithashtu për organizimin e një samiti trepalësh SHBA-Iran-Turqi.
Ministri i Jashtëm iranian në Stamboll
Ndërkohë, Ministri i Jashtëm iranian, Abbas Araghchi, mbërriti në Stamboll këtë mëngjes, ku do të takohet me homologun e tij turk, Hakan Fidan.
Turqia, një anëtare e NATO-s, dëshiron të shmangë me çdo kusht një përshkallëzim ushtarak në rajonin e saj, i cili rrezikon të shkaktojë një valë të re migrimi dhe të krijojë një konflikt të ri në rajon, pas Sirisë.
Turqia gjithashtu ka lidhje të ngushta tregtare me Iranin dhe ndaloi çdo tubim në mbështetje të protestuesve iranianë në fillim të këtij viti.
Si masë paraprake, Ankaraja po përgatitet të “forcojë sigurinë në kufirin e saj” me Iranin, tha një zyrtar i lartë turk për AFP.
Turqia ka ndërtuar tashmë një mur prej 380 kilometrash (238 milje) përgjatë kufirit, “por kjo nuk është e mjaftueshme”, shtoi ai.
Muri, i përforcuar me tela me gjemba dhe llogore të patrulluara 24 orë në ditë nga ushtria turke, u ndërtua për të kufizuar fluksin e migrantëve nga Irani dhe Afganistani dhe trafikun e drogës.
Në kulmin e protestave në Iran, nuk pati rritje të dukshme të flukseve të migracionit, por çdo sulm amerikan mund të ndryshojë situatën.
