Gjykata e Lartë ka njoftuar shtyrjen e seancave gjyqësore të planifikuara për t’u zhvilluar në këtë institucion, me p...
BOTA
Tentativa e VMRO-së për të hequr Gjuhën Shqipe në RMV/ Ali Ahmeti: Dëmton të drejtat e shqiptarëve
PiranjatPërditësimi i fundit 5 Tetor 2025, 09:23
Kryetari i Bashkimit Demokratik për Integrim, Ali Ahmeti, ka folur në detaje për zhvillimet me shqiptarët në Maqedoninë e Veriut, si dhe për përdorimin e gjuhës shqipe në një intervistë televizive. Ahmeti kritikoi ashpër partinë VMRO-DPMNE për qëndrimet nacionaliste dhe përpjekjet për të rishikuar disa nga arritjet e rëndësishme për shqiptarët.
Ai theksoi se platforma e VMRO-së është një përpjekje për të kthyer Maqedoninë vetëm për maqedonasit dhe për të përjashtuar shqiptarët dhe komunitetet e tjera. Sipas Ahmetit, ky është një goditje direkte ndaj Marrëveshjes së Ohrit, e cila garanton të drejtat e shqiptarëve dhe të tjera të komuniteteve në Maqedoni. “VMRO-ja ka dalë me kërkesa që të hapet një plagë e mbyllur, duke përfshirë edhe kërkesën për të rishikuar proceset lidhur me Ushtrinë Çlirimtare Kombëtare dhe të akuzuarit, duke përfshirë dhe mua", u shpreh ai.
Ahmeti theksoi se ky është një kërcënim serioz për Marrëveshjen e Ohrit, që e konsideron themelore për bashkëjetesën dhe stabilitetin në Maqedoni. Ai paralajmëroi se këtë marrëveshje po e rrezikojnë forca që duan ta minojnë integrimin dhe të drejtat e shqiptarëve. "Marrëveshja është seriozisht e rrezikuar, ata po përpiqen ta vënë gozhdën në arkivolin e saj", tha Ahmeti.
Një tjetër shqetësim i ngritur nga Ahmeti ishte tentativat për të hequr Ligjin për Përdorimin e Gjuhës Shqipe. Ai zbuloi se në dhjetor të vitit të kaluar, Gjykata Kushtetuese mori iniciativën për të hequr këtë ligj nga përdorimi, duke e lënë shqipen vetëm në nivel lokal, një hap që për Ahmetin do të dëmtonte të drejtat e shqiptarëve.
Në përgjigje të këtyre përpjekjeve, Ahmeti rrëfeu se qytetarët shqiptarë u ngritën në protestë, duke demonstruar për të mbrojtur të drejtat e tyre. “Protestuam me tenda përpara Gjykatës Kushtetuese, dhe për shkak të mobilizimit, tre gjyqtarë të Gjykatës u tërhoqën dhe seanca u shty”, theksoi ai. Ai paralajmëroi se ky rrezik është ende i pranishëm dhe kërkoi vigjilencë dhe unitet për të mbrojtur të drejtat e shqiptarëve në Maqedoninë e Veriut.
Sipas Ahmetit, veprimet e fundit të VMRO-së dhe tentativat për të minuar marrëveshjet e rëndësishme për shqiptarët janë një kërcënim për stabilitetin dhe paqen në vend, dhe kërkoi që forcat politike të reflektojnë dhe të mos shkatërrojnë arritjet e arritur deri tani.
