Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
BOTA
Trump heq dorë nga bisedimet me Putinin: Nuk doja një takim të dështuar
PiranjatPërditësimi i fundit 22 Tetor 2025, 08:34
Presidenti amerikan Donald Trump ka deklaruar se nuk dëshironte një “takim të dështuar”, pasi planet për një bisedë ballë për ballë me presidentin rus Vladimir Putin mbi luftën në Ukrainë u pezulluan.
Trump, në një deklaratë nga Shtëpia e Bardhë të martën, nënkuptoi se bllokada kryesore mbetet refuzimi i Rusisë për të ndalur luftime përgjatë vijës aktuale të frontit.
Më herët, një zyrtar i lartë i Shtëpisë së Bardhë tha se “nuk ka plane” për një takim Trump–Putin “në të ardhmen e afërt”, duke kundërshtuar deklaratën e presidentit javën e kaluar, ku tha se do të zhvillonin bisedime në Budapest brenda dy javëve.
Këtë javë, u bënë më të qarta dallimet thelbësore mes propozimeve amerikane dhe atyre ruse për paqe, duke zbehur mundësitë për një samit real. Trump dhe Putin u takuan për herë të fundit në gusht në Alaskë, në një samit të improvizuar që nuk solli ndonjë rezultat konkret.
Vendimi për të pezulluar planet për një takim të dytë shihet si përpjekje e Shtëpisë së Bardhë për të shmangur një tjetër përballje pa sukses.
“Supozoj që rusët kërkuan shumë dhe për amerikanët u bë e qartë se nuk do të kishte marrëveshje për Trump në Budapest,” tha një diplomat i lartë evropian për agjencinë Reuters.
Një takim përgatitor mes Sekretarit amerikan të Shtetit, Marco Rubio, dhe Ministrit të Jashtëm rus, Sergei Lavrov, ishte planifikuar për këtë javë, por u anulua pas një telefonate mes tyre që, sipas Shtëpisë së Bardhë, ishte “produktive” dhe e bëri të panevojshme një takim fizik.
Të hënën, Trump mbështeti publikisht një propozim armëpushimi të përkrahur nga Kievi dhe liderët evropianë, që synon ngrirjen e konfliktit përgjatë vijës aktuale të frontit.
“Le të pritet aty ku është,” tha Trump. “Thashë: ndaluni në vijën e betejës. Kthehuni në shtëpi. Ndalo luftën, ndalo vrasjet.”
Rusia ka kundërshtuar vazhdimisht idenë e ngrirjes së konfliktit në linjën aktuale të kontaktit. Zëdhënësi i Kremlinit, Dmitry Peskov, tha se kjo ide është propozuar disa herë, por qëndrimi i Rusisë nuk ka ndryshuar: ajo kërkon tërheqjen e plotë të trupave ukrainase nga lindja.
Ministri i Jashtëm rus, Sergei Lavrov, deklaroi të martën se Rusia kërkon një “paqe afatgjatë dhe të qëndrueshme”, duke nënkuptuar se një armëpushim i ngrirë do të ishte vetëm i përkohshëm. Ai theksoi se duhen adresuar “shkaqet rrënjësore të konfliktit”, term që për Kremlinin përfshin njohjen e sovranitetit rus mbi Donbasin dhe çarmatimin e Ukrainës, kërkesa të papranueshme për Kievin dhe partnerët perëndimorë.
Të njëjtën ditë, liderët evropianë publikuan një deklaratë të përbashkët me presidentin ukrainas Volodymyr Zelensky, ku theksonin se çdo bisedë për përfundimin e luftës duhet të nisë me ngrirjen e vijës aktuale të frontit. Ata akuzuan Rusinë se “nuk është serioze për paqe”.
Zelensky e quajti këtë pikënisje “fillimi i diplomacisë”, por shtoi se Rusia po e shmang me çdo kusht këtë hap. Sipas tij, e vetmja gjë që mund ta detyrojë Moskën të ulet në tryezën e bisedimeve është furnizimi i Ukrainës me armë me rreze të gjatë veprimi.
