Në shtator të vitit 2020, Isa Aliu, 54 vjeç nga Elbasani, shkëmbeu një makinë për një tokë me vlerë 4.1 mi...
BOTA
Trump: Lufta me Iranin zbuloi se nuk ka kufij për pushtetin tim
PiranjatPërditësimi i fundit 19 Qershor 2026, 07:34
Presidenti amerikan, Donald Trump, ka hedhur poshtë kritikat se lufta me Iranin zbuloi kufijtë e aftësisë së tij për të ushtruar pushtet, duke deklaruar në një intervistë për Axios se ai vazhdon të besojë se “nuk ka kufij”.
Trump hyri në konflikt duke kërkuar “dorëzim pa kushte” nga Irani, por lufta përfundoi me një memorandum mirëkuptimi me objektiva më të kufizuara. Megjithatë, presidenti amerikan pranoi se kishte negociuar këtë marrëveshje për të shmangur rrezikun që konflikti të çonte në një recesion ekonomik global.
I pyetur nga gazetari Marc Caputo se çfarë kishte mësuar nga lufta lidhur me kufijtë e fuqisë së tij, Trump u përgjigj: “Nuk ka kufij. Ende nuk e kam mësuar atë mësim. E di që ekzistojnë, por nuk ka kufij”.
Presidenti amerikan pretendoi se SHBA-ja dhe aleatët e saj “i mundën plotësisht nga pikëpamja ushtarake” dhe shtoi se edhe memorandumi i arritur “ndoshta përbën një dorëzim pa kushte”. Sipas tij, konflikti shërbeu si provë e fuqisë ushtarake amerikane.
“Cili vend tjetër mund të realizonte një bllokadë të tillë? Vendosa një bllokadë detare ku asnjë anije nuk arriti të kalonte. Disa u përpoqën, por nuk zgjati shumë”, deklaroi ai.
Megjithatë, Trump pranoi se alternativat ndaj marrëveshjes mund të kishin pasoja shumë serioze. Duke iu përgjigjur kritikave se nuk tregoi ashpërsi të mjaftueshme ndaj Iranit, ai tha se alternativa e vetme do të ishte vazhdimi i bombardimeve për disa javë të tjera.
“Mund të vazhdonim t’i bombardojmë pa mëshirë për dy ose tre javë të tjera. Por çfarë do të fitonim nga kjo? Ngushtica e Hormuzit nuk do të ishte e hapur”, tha ai.
Trump paralajmëroi se mbyllja e kësaj rruge strategjike detare do të kishte pasoja të rënda për tregjet globale të energjisë.
“Nuk do të kishim naftë për muaj të tërë. Kur bien bombat, ai kalim mbyllet automatikisht. Kjo mund të shkaktonte një recesion ekonomik global”, theksoi presidenti amerikan.
