Numri i viktimave nga tërmetet e fuqishme që goditën Venezuelën më 24 qershor ka arritur në 5,278, sipas bilancit më të...
BOTA
Trump paralajmëroi tarifa të reja shtesë/ Reagon Kina: Askush nuk fiton nga lufta tregtare
E.DPërditësimi i fundit 26 Nëntor 2024, 16:58
KINA- Kina ka lëshuar një reagim ndaj Donald Trump për planet e tij për të vendosur tarifa të reja, duke thënë se askush nuk do të fitojë një luftë tregtare. Presidenti i zgjedhur tha të hënën se do të vendosë një tarifë shtesë prej 10 për qind për produktet kineze që hyjnë në SHBA kur të kthehet në Shtëpinë e Bardhë, duke paralajmëruar se sasi masive droge po derdhen ende në SHBA, pavarësisht bisedimeve të shumta.
“Kam pasur shumë biseda me Kinën rreth sasive masive të drogës, veçanërisht fentanilit, që dërgohen në Shtetet e Bashkuara por pa dobi. Përfaqësuesit e Kinës më thanë se do të vendosnin dënimin e tyre maksimal, atë të vdekjes, për çdo tregtar droge që kapej duke e bërë këtë, por, për fat të keq, ata nuk e ndoqën këtë, dhe droga po derdhet në vendin tonë, kryesisht përmes Meksikës, në nivele të papara. Deri në momentin që ata të ndalojnë, ne do t’i ngarkojmë Kinës një tarifë shtesë prej 10%, mbi çdo tarifë shtesë, për të gjitha produktet e tyre të shumta që vijnë në Shtetet e Bashkuara të Amerikës," shkroi ai në Truth Social.
Duke reaguar ndaj deklaratës së Trump, Liu Pengyu, zëdhënësi i Ambasadës Kineze në SHBA, shkroi në X: "Bashkëpunimi ekonomik dhe tregtar Kinë-SHBA është reciprokisht i dobishëm. Askush nuk do të fitojë një luftë tregtare apo një luftë tarifore".
Gjithashtu ai tha se autoritetet kundër narkotikëve të Kinës dhe SHBA-së kanë rifilluar komunikimin e rregullt që nga Samiti i San Franciskos. Pala kineze ka njoftuar palën amerikane për përparimin e bërë në operacionet e zbatimit të ligjit të SHBA-së kundër narkotikëve. Kina i është përgjigjur kërkesës së SHBA për të verifikuar të dhëna për raste të caktuara dhe masat e marra.
“Të gjitha këto dëshmojnë se ideja e Kinës që me vetëdije lejon që pararendësit e fentanilit të rrjedhin në Shtetet e Bashkuara bie plotësisht në kundërshtim me faktet dhe realitetin,” shtoi ai më tej.
