“Unë jam kancelari”/ Olaf Scholz shpërthen para partnerëve tij politikë, përpiqet të mbajë të bashkuar qeverinë: Duhet të kapërcejmë sfidat dhe të bëjmë më shumë

Olaf Scholz

GJERMANI- Kancelari gjerman Olaf Scholz nuk e ka fshehur acarimin e tij për problemet e koalicionit qeverisës, duke u bërë thirrje njëkohësisht partnerëve të tij për “seriozitet”. Scholz tha se ka çështje që duhen zgjidhur dhe për ta bërë këtë, duhet punuar shumë.

“Unë jam kancelari. Çështja është të kapërcejmë sfidat me të cilat përballemi në kohët e vështira në të cilat jetojmë. Çështja është ekonomia dhe vendet e punës. Çështja është pragmatizmi, jo ideologjia. Ka çështje që duhen zgjidhur dhe për ta bërë këtë, duhet punuar shumë. Kjo është ajo që unë pres nga të gjithë”, tha Olaf Scholz në përgjigje të një pyetjeje gjatë një konference për shtyp që ai dha më herët mbrëmjen e sotme me Sekretarin e Përgjithshëm të NATO-s Mark Rutte.

Kancelari ishte takuar më herët me Ministrin e Ekonomisë Robert Habeck (Të Gjelbrit) dhe Ministrin e Financave Christian Lindner (FDP) në një përpjekje për të kapërcyer hendekun e shkaktuar nga teksti i pozicionit të paraqitur nga ky i fundit javën e kaluar. 

Një prishje e mundshme e koalicionit qeverisës do të shkaktonte gjithashtu probleme serioze për të Gjelbërit, të cilët do të zgjedhin udhëheqjen e tyre të re në mes të muajit dhe planifikojnë të vendosin për strategjinë e tyre të fushatës dhe programin e ri marsin e ardhshëm. Prandaj, një fushatë zgjedhore e parakohshme do të ishte e vështirë nga pikëpamja organizative.

Në të kundërt, CDU/CSU pretendon se ka qenë në gatishmëri elektorale për një kohë të gjatë. Sekretari i Përgjithshëm i Partisë Demokristiane (CDU) Carsten Linnemann tha sot se qeveria “duhet të marrë tani përgjegjësi më të madhe politike dhe t’i japë fund çështjes. Gjermania ka nevojë për një rifillim dhe zgjedhje sa më shpejt të jetë e mundur”.

Sekretari i përgjithshëm i Unionit Kristian Social (CSU) Martin Huber madje i kërkoi presidentit federal Frank-Walter Steinmeier të ndërhyjë “dhe t’ua bëjë të qartë atyre që po argumentojnë se është koha për zgjedhje”.

olaf scholz