Pas ditës së pestë të protestës studentore, kryeministri Edi Rama njoftoi se efektivët e angazhuar në protestë do të...
BOTA
Vala e re e protestave të shtunën, Italia nxjerr mijëra policë në rrugë
PiranjatPërditësimi i fundit 23 Tetor 2026, 21:01
Italia dhe Franca pritet të përballen me protesta të shumta të shtunën, më 24 tetor, për shkak të rritjes së kostos së jetesës. Autoritetet italiane kanë marrë masa të shtuara sigurie, nga frika se mund të përsëriten incidentet e dhunshme të 17 dhe 18 tetorit, kur grupe protestuesish u përfshinë në përplasje me forcat e rendit dhe dëmtuan dyqane.
Në Romë do të angazhohen rreth 1.500 efektivë policie, ndërsa në Milano do të vendosen rreth 1.800 punonjës policie, karabinierë dhe ushtarë. Masat synojnë të garantojnë sigurinë gjatë tubimeve të paralajmëruara dhe atyre spontane, të organizuara përmes rrjeteve sociale.
Protesta janë planifikuar në disa qytete italiane, përfshirë Milanon, Bolonjën, Xhenovën, Torinon, Romën dhe Firencen. Sipas faqes “Mappa della rivolta”, e cila mbledh informacion mbi nismat e protestave, janë planifikuar më shumë se 30 aktivitete, mes tyre marshime, tubime, mbledhje dhe greva.
Në kryeqytetin italian, autoritetet kanë hartuar një plan të posaçëm sigurie. Përveç njësive të zakonshme të policisë, do të përdoren dronë të Policisë së Shtetit dhe mjete fluturuese të karabinierëve. Kontrollet do të shtrihen nga sheshet kryesore deri te stacionet hekurudhore.
Qendra e Sigurisë Kibernetike e Romës po monitoron gjithashtu aktivitetin në rrjetet sociale, në bashkëpunim me Digos, njësinë e specializuar të Policisë së Shtetit që merret me hetimin e kërcënimeve dhe veprimtarive ekstremiste.
Shqetësim për autoritetet përbën edhe përhapja në Telegram, TikTok dhe Instagram e udhëzimeve se si të përgatiten protestuesit për përplasje me policinë. Këto materiale përmbajnë këshilla për sendet që duhen marrë me vete, veshjet që duhen përdorur dhe mënyrën e veprimit në rast trazirash. Disa prej tyre përmendin edhe përdorimin e ujit, qetësuesve të dhimbjeve dhe uthullës për të lehtësuar efektet e gazit lotsjellës.
Në Milano, përveç rreth 1.000 efektivëve të policisë dhe karabinierëve, do të angazhohen edhe 300 punonjës të policisë bashkiake dhe 500 ushtarë. Edhe në këtë qytet do të përdoren dronë për të monitoruar marshimet. Tubimet e autorizuara do të zhvillohen larg zonës së Katedrales së Milanos, ndërsa protestat janë ndaluar në zonat Garibaldi dhe Porta Venezia.
Në Torino pritet gjithashtu një demonstratë e organizuar nga aktivistë të grupeve radikale, të lidhur me ish-qendrën sociale Askatasuna, së bashku me përfaqësues të Lëvizjes së 17 Tetorit dhe studentë. Marshimi është planifikuar të nisë në orën 14:00 nga sheshi Arbarello.
Ndërkohë, pas trazirave të 17 tetorit, të premten policia italiane zhvilloi kontrolle në disa qytete, duke përfshirë Barin, Bergamon, Firencen, Xhenovën dhe Veronën. Operacionet e Digos prekën rreth 100 persona, 51 prej të cilëve të mitur.
Autoritetet dhe bizneset kanë shprehur shqetësimin se protestat e së shtunës mund të shoqërohen sërish me dhunë, dëmtime të pronës dhe përplasje me forcat e rendit. Për këtë arsye, masat e sigurisë janë përforcuar në qytetet kryesore italiane, ndërsa policia po ndjek nga afër organizimin e tubimeve dhe aktivitetin në internet.
