VIDEO nga momenti/ Ndjekja ‘rrufe’ prej 160 km në orë e Passatit nga policia që përfundoi me 7 të vdekur

Ky është momenti kur tre makina policie ndjekin një të dyshuar në një rrugë të ngushtë banimi me shpejtësi të lartë, vetëm pak minuta para se shtatë persona të humbnin jetën në një aksident tragjik në Britani.

Dy policë të armatosur, Matthew Blades, 37 vjeç, dhe Tom Clough, 38 vjeç, humbën jetën pasi automjeti i tyre u përplas me një Volkswagen Passat në A66, pranë Middlesbrough të Britanisë, në orët e para të mëngjesit.

Pamjet rrëqethëse nga një kamerë sigurie, të siguruara nga The Sun, tregojnë Passat-in duke përshkuar me shpejtësi rrugën në orën 03:36 të së shtunës.

Në pamje shihet automjeti duke kaluar me shpejtësi pranë banesave, ndërsa vetëm pak sekonda më vonë shfaqen dy makina policie. Të dyja kishin dritat blu të ndezura dhe sirenat në funksion, ndërsa ndiqnin të dyshuarin.

Ndjekja dramatike kishte nisur rreth një milje larg vendit ku ndodhi përplasja tragjike. Zyra e Policisë (IOPC) tha se oficerët kishin konstatuar Passat-in si një “automjet të dyshimtë” dhe kishin nisur ndjekjen.

Në ndjekje ishte përfshirë edhe një makinë e tretë policie, ndërsa dëshmitarët thanë se tre makina patrullimi po ndiqnin automjetin në drejtim të autostradës A66. Banorët u zgjuan në orën 03:36 nga zhurma e frenimit dhe gomave që përplaseshin në asfalt, ndërsa automjeti mori kthesën drejt rrugës së tyre të ngushtë.

Ellie Westerman, 24 vjeçe, banore e shtëpisë nga ku i filmua momenti, tha: “Makina duhet të ketë qenë duke lëvizur me një shpejtësi prej 160 km në orë në rrugën tonë të ngushtë.

Zhurma më zgjoi dhe u ngrita menjëherë nga shtrati. Mund të ndjeje dridhjet në shtëpi teksa makina kaloi dhe makinat e policisë e ndoqën pas, me dritat dhe sirenat të ndezura. Ishte e frikshme që makinat po drejtoheshin me atë shpejtësi në një zonë banimi dhe është tragjike që njerëzit kanë humbur jetën.”  /PiranjatNews/