Justin Baldoni tërheq thirrjen në gjyq ndaj Taylor Swift/ Blake Lively: Ata u përpoqën ta shfrytëzonin atë që nga dita e parë

SHBA- Edhe pse Taylor Swift ka qenë në qendër të mosmarrëveshjes ligjore midis Blake Lively dhe Justin Baldonit, më në fund duket se ajo mundet, për momentin, të “shkundet” nga hija e rëndë e përfshirjes së saj në këtë çështje.

Në një veprim të papritur, ylli dhe regjisori i filmit "It Ends With Us", në të cilin ai luajti bashkë me Lively-n, tërhoqi thirrjen zyrtare në gjyq që i kishte dërguar Swift-it dhe avokatit të saj, J. Douglas Baldridge, duke i kërkuar informacion rreth asaj që ylli i pop-it dinte për marrëdhënien e mikut të saj Blake Lively me bashkëthemeluesin e Wayfarer Studios, Justin Baldoni, gjatë xhirimeve të filmit për dhunën në familje. Sipas burimeve, tërheqja e urdhrit të gjykatës është pjesërisht për shkak të faktit se informacioni i kërkuar nga pala Baldoni është dhënë në një mënyrë tjetër.

Përfaqësuesit e Baldonit, Wayfarer Studios dhe bashkëpunëtorëve të tij refuzuan të komentonin të enjten, më 22 maj, mbi çështjen e tërheqjes së urdhrit të gjykatës kundër Swift, ndërsa përgjigjja e këngëtares së famshme ishte e thjeshtë: Pa koment.

Taylor Swift është një shoqe e ngushtë e Lively dhe nënë kumbare e njërit prej fëmijëve të saj me Ryan Reynolds. Shumë kohë përpara se thirrja e Swift në gjyq të zbulohej më 14 maj, emri i saj ishte përmendur vazhdimisht në paditë e të dyja palëve, pas ankesës fillestare që Lively paraqiti më 20 dhjetor 2024, pranë Komisionit të të Drejtave Civile të Kalifornisë, duke pretenduar ngacmim seksual dhe hakmarrje nga Baldoni.

Megjithatë, pala e Lively kishte shumë për të thënë pas tërheqjes: Jemi të kënaqur që Justin Baldoni dhe Wayfarer kanë tërhequr thirrjet në gjyq që ngacmuan Taylor Swift dhe firmën e saj ligjore. Ne mbështetëm përpjekjet e ekipit të Taylor për të anuluar këto thirrje të papërshtatshme në gjyq dhe do të vazhdojmë të mbrojmë çdo palë të tretë që ngacmohet ose kërcënohet padrejtësisht gjatë këtij procesi.