"Trilleri i mbijetesës, i frymëzuar nga sulmet e orkave në jetën reale..."/ John Travolta do të luajë në filmin “Black Tides”

SHBA- John Travolta do të marrë rolin kryesor në trillerin e ardhshëm të mbijetesës "Black Tides". Filmi është drejtuar nga Renny Harlin, i njohur për filmat e suksesshëm "Deep Blue Sea" dhe "Die Hard 2". Aktori i nominuar dy herë për çmimin Oscar do të luajë Bill Pierce, "një baba i larguar që përpiqet të rilidhet me vajzën dhe nipin e tij". Megjithatë, përpjekja e tij do të marrë përmasa të tmerrshme kur varka e tyre të bëhet shënjestër e balenave vrasëse të pamëshirshme në brigjet jugore të Spanjës.

Trilleri i mbijetesës është i frymëzuar nga sulmet e orkave në jetën reale që kanë ndodhur pranë brigjeve të Spanjës jugore dhe Portugalisë. Skenari është shkruar nga Chris Sparling dhe Angel Agudo. Sipas Deadline, filmi "do të xhirohet në mënyrën e vjetër, me efekte brenda kamerës dhe punë të vërtetë me ujë".

Prodhimi është ndërmarrë nga Nostromo Pictures e Adrián Guerra dhe Nuria Valls. Kompania "The Solution Entertainment Group" ka marrë përsipër shitjet globale, përveç Spanjës, në Festivalin e Filmit në Kanë. Producenti Adrian Guerra e vlerësoi aktorin kryesor, duke theksuar rëndësinë thelbësore të Travoltës për filmin.  

"Në një sipërmarrje si kjo, i zgjedh partnerët kryesorë me shumë kujdes. 'Xhoni është padyshim një prej tyre'", tha ai në mënyrë karakteristike, duke theksuar karrierën e tij të pasur artistike dhe aftësinë e tij të lindur për t'u dhënë jetë personazheve që lënë një gjurmë të përjetshme.