Kongresmeni amerikan, Ritchie Torres ka reaguar lidhur me revoltat studentore dhe dhunën që policia ka ushtruar ndaj të rinjve, duke k&eu...
INVESTIGIME
Pallati që po “ha” pallatin tjetër! Ndërtimi i kompanisë së preferuar të Bashkisë rrezikon jetën e dhjetëra familjeve
PiranjatPërditësimi i fundit 17 Tetor 2025, 21:24
Jemi në Paskuqan, aty ku vitet e fundit pallate e komplekse banimi kanë nisur të ndërtohen e shtohen çdo vit, duke mbirë ashtu si kërpudhat pas shiut — ndonjëherë pa asnjë plan urbanistik, e në raste të tjera duke rrezikuar pallatet ngjitur. Si në rastin që do të trajtojmë, ku një pallat që ka nisur të ndërtohet nga kompania “2N” sh.p.k., rrezikon pallatin ngjitur, pasi gropa e hapur nga kompania për ndërtimin e tij është ngjitur dhe madje ka nxjerrë në pah themelet e pallatit ekzistues.
Kjo ka shtuar frikën te banorët, të cilët i janë drejtuar disa herë institucioneve për të gjetur zgjidhje, por siç shprehen ata, kanë gjetur derën e mbyllur. Ndërkohë, makineritë e rënda që kalojnë kanë shkaktuar shqetësim te banorët për sigurinë e tyre, ndërsa shprehen se sa herë ka gërmime te gropa që po hapet, lëkundjet ndihen edhe në shtëpitë e tyre.
Pronari i kompanisë “2N” sh.p.k., zoti Namik Shahini, shprehet se ka marrë leje nga Bashkia Kamëz për objektin që po ndërton, ndërsa shton se nuk po rrezikon jetën e askujt — pavarësisht se refuzon të thotë se si ka mundësi që gropa e pallatit të tij ka nxjerrë në pah themelet e pallatit tjetër, i cili banohet nga dhjetëra familje.
Ndërsa Oficeri i Policisë Gjyqësore, Dritan Kolndreu, i cili ka marrë edhe denoncimin e banorëve në Komisariatin e Policisë Kamëz, na tha në një telefonatë se ishte në mbledhje dhe do të na telefononte sapo të mbaronte, por nuk mori më — duke i bërë bisht detyrës për të cilën paguhet.
Ndërkohë, kompania “2N”, mesa duket, është një nga kompanitë e preferuara të Bashkisë Kamëz dhe kryebashkiakut Rakip Suli, pasi nga një vëzhgim shihet se ka përfituar disa tenderë për punë publike në këtë bashki. Prandaj u nisëm të pyesim zotin Suli për shqetësimin e banorëve, por në vend që të merrnim përgjigje, u përballëm me një sjellje arrogante, tallëse dhe qesharake, që nuk i shkonte aspak për shtat detyrës që mban zoti Suli si qytetari i parë i Kamzës.
Në fund, përveç mallkimeve që na uroi, nuk pranoi të flasë për problemin që kanë banorët që e kanë zgjedhur — dhe që nesër, me shumë mundësi, do të shkojë sërish t’u kërkojë votën. /Piranjat/
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi
