Pedagogu Aleksandër Kovaçi tha para derës së kryeminsitrisë se nuk do të ketë dilaog me Ramë...
KOSOVA
Bllokada institucionale, mblidhet sërish sot Kuvendi i Kosovës
PiranjatPërditësimi i fundit 10 Tetor 2025, 09:44
Rreth një muaj e gjysmë pas ndërprerjes së fundit të seancës konstituive, deputetët e legjislaturës së nëntë do të mblidhen sërish këtë të premte për të përmbyllur procesin e konstituimit të Kuvendit. Seanca është thirrur për në orën 10:00 dhe ka një pikë të vetme në rendin e ditës: zgjedhja e nënkryetarit të Kuvendit nga radhët e komunitetit serb.
Kjo seancë vjen menjëherë pas publikimit të aktgjykimit të plotë të Gjykatës Kushtetuese, e cila trajtoi kërkesën e ngritur nga Lista Serbe, që kishte kontestuar përfundimin e seancës konstituive pa zgjedhjen e përfaqësuesit të tyre për nënkryetar.
Në vendimin e saj, Gjykata Kushtetuese theksoi se mospropozimi i një kandidati nuk mund të përdoret si mjet për të bllokuar konstituimin e Kuvendit, duke sqaruar se Kuvendi mund të funksionojë edhe pa zgjedhur të gjithë nënkryetarët.
Në arsyetimin e vendimit, Gjykata ka sqaruar se e drejta për të propozuar një nënkryetar nuk nënkupton edhe të drejtën për të penguar procesin parlamentar. Po ashtu, është theksuar se votimi i ndarë për nënkryetarët është në përputhje me Kushtetutën, pavarësisht kundërshtimeve nga disa parti politike.
Gjykata ka cilësuar si të ligjshme edhe zgjedhjen e Emilja Rexhepit si nënkryetare e Kuvendit, duke e konsideruar këtë proces si të rregullt kushtetues.
Të enjten u bënë tetë muaj nga mbajtja e zgjedhjeve të përgjithshme, ndërsa konstituimi i plotë i Kuvendit mbetet i papërfunduar që nga seanca e parë e mbajtur më 15 prill. Me zgjedhjen e nënkryetarit serb, Kuvendi do ta përmbyllë më në fund këtë proces dhe do t’i hapë rrugën krijimit të qeverisë së re.
Pas aktgjykimit të Gjykatës Kushtetuese, ka nisur një afat 12-ditor për përfundimin e konstituimit, por institucioni nuk ka përcaktuar qartë se cilat janë pasojat nëse ky afat nuk respektohet.
Gjykata Kushtetuese ka vënë në dukje se dështimi për konstituim nuk ka ardhur për shkak të mungesës së kandidatit, por për shkak të mosvotimit nga shumica e deputetëve të Kuvendit. Në seancat e mëparshme nuk kanë votuar deputetët e Lidhjes Demokratike të Kosovës (LDK), Listës Serbe, dhe në disa raste as ata të Aleancës për Ardhmërinë e Kosovës (AAK).
Gjykata ka rikujtuar se pjesëmarrja dhe votimi në seanca është detyrim kushtetues për çdo deputet, duke nënvizuar se votimi, qoftë për, kundër apo me abstenim, është pjesë e funksionimit demokratik të Kuvendit.
Me vetëm një pikë në rend dite – zgjedhjen e nënkryetarit nga komuniteti serb – seanca e sotme pritet të jetë vendimtare për përmbylljen e konstituimit të legjislaturës dhe për nisjen e procesit për formimin e institucioneve të reja.
Tani pritet të shihet nëse deputetët do ta përmbushin këtë obligim kushtetues, duke i dhënë fund një periudhe të gjatë bllokade institucionale.
