Pasuri me vlerë 77 milionë lekë janë vendosur nën sekuestro preventive në kuadër të hetimit të SPAK për traf...
KOSOVA
Dy javët vendimtare për Presidentin e ri në Kosovë
PiranjatPërditësimi i fundit 15 Prill 2026, 10:12
Kosova ka hyrë në dy javët vendimtare politike. Nëse deputetët nuk zgjedhin një president deri më 28 prill, atëherë qytetarët do të detyrohen të dalin të votojnë sërish në zgjedhje parlamentare – për herë të tretë në një vit e gjysmë. Por përderisa ditët po ecin, partitë duken larg arritjes së një marrëveshjeje finale.
Përderisa opozita po e akuzon Vetëvendosjen në pushtet se nuk është e interesuar të zgjedhë presidentin, VV-ja po i kritikon opozitarët për mungesë të propozimeve.
Sekretarja e Përgjithshme e Partisë Demokratike të Kosovës, Vlora Çitaku, ka thënë se nëse Vetëvendosje nuk është e interesuar ta zgjedhë presidentin me partinë që ajo përfaqëson, le t’i japë zgjidhje situatës me deputetët e partive të tjera.
Ajo e theksoi këtë të martën, pasi deri tash kryeministri Albin Kurti që e drejton LVV-në, nuk i është përgjigjur kushtit të vënë nga partia kryesore në opozitë që takimit mes liderëve të të dyja partive t’i paraprijë një letër në format zyrtar.
“Ne kemi deklaruar që kjo çështje duhet të trajtohet me seriozitetin që i takon çështjes në fjalë dhe kemi kërkuar nga Albin Kurti që ta formalizojë kërkesën e tij karshi PDK-së, në një letër të shkruar. Deri në këtë moment një letër e tillë nuk ka ardhur në adrese të PDK-së, ndoshta ka adresa tjera”, ka thënë Çitaku.
Pas konstituimit të Kuvendit, Kurti ka zhvilluar takime me kryetarin e PDK-së, Bedri Hamza, por të tilla kanë munguar pas aktgjykimit të Kushtetueses për presidentin.
E, me kryetarin e LDK-së, Lumir Abdixhiku, është takuar deri tash 4 herë, përfshirë një herë edhe pas aktgjykimit të fundit të Kushtetueses. Në fund të javës së shkuar, Abdixhiku ka thënë se do një marrëveshje të madhe me LVV-në dhe se nuk e mbështet asnjë prej dy kandidatëve të saj për president.
Ndërkaq deputeti i Lidhjes Demokratike të Kosovës, Armend Zemaj, ka deklaruar se mungon vullneti politik nga Lëvizja Vetëvendosje për zgjedhjen e një presidenti.
“Po nëse nuk ka zgjidhje në afatin i cili tashmë është dhënë dhe ditët janë vetëm duke u harxhuar, jemi më afër zgjedhjeve sesa një zgjidhje që po shihet. Sepse në mungesë të vullnetit të partisë shumicë, duket që nuk ka interesim që të kemi një president në këtë fazë, ose një president siç është kërkuar dhe kërkohet sipas Kushtetutës, që është një president konsensual dhe i cili përfaqëson të gjithë qytetarët e Republikës së Kosovës”, ka thënë ai për “Ekonomia Online”.
Shefja e Grupit Parlamentar të LVV-së, Arbërie Nagavci, është shprehur se Kurti është duke u angazhuar që t’i japë zgjidhje situatës, me qëllimin për t’i evituar zgjedhjet e parakohshme.
“Kryeministri Kurti është duke vazhduar angazhimet e tij dhe unë besoj në ditët e mbetura, sepse nuk kanë mbetur edhe shumë ditë, të arrijmë një pajtueshmëri dhe një mbështetje, gjegjësisht propozime konkrete dhe të gjejmë një zgjidhje për zgjedhjen e presidentit”, ka thënë Nagavci.
Bazuar në aktgjykimin e Kushtetueses, presidenti duhet të zgjidhet deri më 28 prill, në të kundërtën vendi shkon në zgjedhje të parakohshme që duhet të organizohen brenda 45 ditëve.
Mandati i presidentes së shkuar, Vjosa Osmani, përfundoi më 4 prill. Nga ajo ditë, shteti është me ushtruese detyre të presidentes, Albulena Haxhiun.
Më 25 mars, Gjykata Kushtetuese u dha deputetëve 34 ditë afat për të zgjedhur presidentin duke e shpallur të pavlefshëm juridikisht një dekret të Osmanit për shpërndarje të Kuvendit që nuk zgjodhi president deri më 5 mars.
Për Osmanin, VV-ja ka thënë se s’i kanë pasur të sigurta 80 votat e nevojshme. Në seancën e 5 marsit, në Kuvend VV-ja propozoi Glauk Konjufcën dhe Fatmire Mulhaxhën për president. Votimi nuk nisi në mungesë kuorumi.
