Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
KOSOVA
Ndërhyrjet e Serbisë në zgjedhjet lokale të Kosovës, Raportuesi i BE: Veprime armiqësore dhe përshkallëzuese
PiranjatPërditësimi i fundit 12 Tetor 2025, 09:19
Raportuesi për Kosovën në Parlamentin Evropian, Riho Terras, ka dënuar ashpër atë që e cilësoi si “manipulim dhe ndërhyrje” të Serbisë në zgjedhjet lokale në Kosovë, duke i quajtur veprimet serbe “armiqësore dhe përshkallëzuese”.
Përmes një postimi në platformën X të premten, dy ditë para mbajtjes së zgjedhjeve lokale në Kosovë, Terras tha se ndikimi i drejtpërdrejtë i Serbisë në këto zgjedhje është bërë sërish i qartë.
“Zyrtarët e Qeverisë së Serbisë publikisht kanë shpallur mbështetjen e tyre për një parti të caktuar politike serbe në Kosovë, kanë njoftuar zgjerimin e ndihmës sociale dhe kanë premtuar vende të reja pune në institucionet e drejtuara nga Serbia në Kosovë, pikërisht në ditët para zgjedhjeve,” theksoi Terras. Ai u bëri thirrje autoriteteve serbe që të ndalin çdo formë të ndërhyrjes në procesin zgjedhor dhe t’i lejojnë qytetarët e Kosovës të zgjedhin lirshëm dhe në mënyrë demokratike përfaqësuesit e tyre lokalë.
“Veprimet e Serbisë kanë për qëllim përshkallëzimin e situatës tashmë të ndjeshme në Kosovë dhe janë qartësisht armiqësore,” tha ai. Në prag të zgjedhjeve, zyrtarë të lartë serbë, përfshirë presidentin Aleksandar Vuçiç, kanë bërë premtime për komunitetin serb në Kosovë, duke u bërë thirrje atyre të votojnë për Listën Serbe, partinë që gëzon mbështetjen e plotë të Beogradit. Vuçiç më 5 tetor njoftoi hapjen e konkursit për 400 vende të reja pune në sektorin e shëndetësisë në Kosovë.
Një ditë më pas, ministri i Shëndetësisë së Serbisë, Zllatibor Llonçar, e përforcoi këtë premtim, duke e quajtur një “dëshmi të përkushtimit të Serbisë ndaj qytetarëve serbë në Kosovë”.
Ndërkohë, më 7 tetor, drejtori i Zyrës për Kosovën në Qeverinë e Serbisë, Petar Petkoviç, u bëri thirrje serbëve në Kosovë dhe të shpërngulurve me dokumente kosovare të votojnë për Listën Serbe, duke premtuar vazhdim të projekteve infrastrukturore dhe ndihmë financiare nga Beogradi.
Veprimet e Serbisë janë dënuar nga udhëheqësit më të lartë të Kosovës, përfshirë presidenten Vjosa Osmani dhe kryeministrin në detyrë Albin Kurti, të cilët kanë akuzuar Serbinë për ndërhyrje të drejtpërdrejtë në zgjedhjet lokale.
Ndërhyrje të ngjashme nga Serbia ishin raportuar edhe gjatë zgjedhjeve të përgjithshme të mbajtura më 9 shkurt, të cilat u denoncuan nga autoritetet kosovare dhe misioni vëzhgues i BE-së. Edhe Gjermania kishte ngritur akuza për trysni ndaj votuesve serbë në ato zgjedhje.
Zgjedhjet lokale në Kosovë po zhvillohen në 38 komuna, me një pjesëmarrje të gjerë të partive dhe iniciativave serbe, përfshirë edhe katër parti të tjera përveç Listës Serbe.
