Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
KOSOVA
Operacion special kundër bosëve të drogës, pas përgjimeve në 'Sky ECC'! Arrestohen 7 persona
PiranjatPërditësimi i fundit 24 Shtator 2025, 16:17
Një operacion i gjerë ka nisur në orët e hershme të mëngjesit të mërkurën, ndaj dy rrjeteve të rrezikshme të kokainës dhe heroinës në Kosovë. Mbi 20 lokacione të ndryshme nëpër Kosovë, janë bastisur nga mëngjesi i datës 24.09.2025, ndërsa operacioni vjen si rrjedhë e operacionit paraprak për përgjimet e “Sky ECC”.
Deri më tani janë mbi gjashtë persona të arrestuar ndërsa janë bastisur prona të shumta të personave që lidhen me hetimin e “Sky ECC”. Po ashtu dy hotele e dhjetëra prona të tjera janë sekuestruar.
Grupet dyshohet se trafikuan drogë nga Ekuadori në Kosovë ndërsa nga Kosova transportohej në Turqi e heroina nga Turqia në Kosovë. Gjatë këtij operacioni, autoritetet thanë se sekuestruan sasi të konsiderueshme të provave materiale, përfshirë edhe afër 700 gramë drogë, të dyshuar kokainë, para të gatshme në vlerë prej mbi 11 mijë eurosh, 34 automjete, shtatë armë zjarri, dokumente personale me identitet të rremë dhe pajisje të ndryshme elektronike.
Për këtë operacion, autoritetet kosovare bashkëpunuan me homologët ndërkombëtarë nga Belgjika, Franca, Holanda dhe me Europol-in.
Në qershor të këtij viti, Policia e Kosovës kishte arrestuar 22 persona në një operacion antidrogë. Atëbotë, autoritetet thanë se shkatërruan një grup të krimit të organizuar dhe trafikimit me narkotikë, që dyshohet se i kishin kryer veprën penale të krimit të organizuar përmes aplikacionit SkyECC.
