Spanja po përballet me një nga zjarret më të mëdha dhe më të vështira të viteve të fundit. Mbi 600 zjarrfik&...
BOTA
Dueli i titanëve: BMW iX3 kundër Mercedes GLC – kush e sundon epokën elektrike?
PiranjatPërditësimi i fundit 21 Shtator 2025, 14:32
Kur BMW dhe Mercedes nisin një duel, bota e makinave ndalet. Në IAA Mynih, dy gjigantët gjermanë prezantuan armët e tyre më të reja elektrike: BMW iX3 dhe Mercedes GLC. Të dy SUV të mesëm, të dy premium, të dy të lindur për t’u bërë simbol statusi. Por vetëm njëri ngjitet në fron.
Pamja që të ngul sytë
BMW iX3 luan kartën e agresivitetit: grilë vertikale retro që ndriçohet si një diamant dhe linja të mprehta që i japin muskuj. Mercedes GLC është më klasik, por me drita yjesh trefishe dhe një grilë që shndrit me mbi 900 pika drite. Një spektakël vizual që të ndal frymën.
Dimensionet që bëjnë diferencën
GLC është “big boss”: më i gjatë, më i gjerë dhe me bagazh më të madh – 570 litra për Mercedes kundër 520 të BMW. Edhe frunk-u (bagazhi i përparmë) është më i gjerë: 128 litra kundër vetëm 58 të rivalit bavarez. Pra, nëse jeton për udhëtime të gjata, Mercedes është miku yt i ngarkesave.
Kabinat: futurizëm apo luks klasik?
BMW ofron minimalizëm high-tech me Panoramic Vision që projekton informacion në xhamin e përparmë – sikur të ishe në kokpit avionit. Mercedes, ndërkohë, të josh me Hyperscreen, një mur gjigant ekrane që të mbulon gjithë panelin. BMW është “cool futurist”, Mercedes është “kështjellë teknologjie”. Zgjedhja është çështje egoje.
Motori dhe autonomia: kush e ka më të madhin?
Mercedes GLC 400 4Matic: 489 kuaj fuqi dhe transmision me dy shpejtësi. Fuqi brutale dhe elegancë në kursim energjie. BMW iX3 50 xDrive: 469 kuaj fuqi, por me bateri më të madhe dhe autonomi që të lë pa fjalë: deri 805 km kundrejt 713 km të GLC-së. Plus, karikon më shpejt – 372 km në 10 minuta. Në garën e distancës, BMW e fiton kupën.
Përvoja në rrugë
BMW është adrenalina e pastër: sistem dinamik super-inteligjent dhe ndalim më i butë se çdo BMW tjetër në histori. Mercedes është limuzina e maskuar si SUV: pezullim ajri nga S-Class dhe timon në boshtin e pasmë që ta kthen parkimin në lojë fëmijësh.
Çmimet
BMW vjen në pranverën 2026 me çmim fillestar 68,900 euro. Mercedes pritet në verë, pak më i kripur, rreth 70,000 euro. Dy shifra që tingëllojnë si biletë hyrëse për elitën elektrike.
Verdikti
Nëse do adrenalinë, shpejtësi karikimi dhe distanca të gjata – BMW iX3 është makina jote. Nëse kërkon fuqi brutale, hapësirë dhe luks klasik gjerman – Mercedes GLC është përgjigjja.
Por një gjë është e sigurt: të dy këta kolosë janë më shumë se makina. Janë simbol pushteti./ Përshtati Piranjat.al.
Ky material është marr nga: "Auto Motor und Sport" është një nga revistat më prestigjioze gjermane për makina dhe një prej më të vjetrave në Europë e themeluar në vitin 1946 dhe është ndër botimet kryesore për automobilizëm në Gjermani dhe Europë. Shitet në format të printuar dhe ka edhe abonim digjital.
