"'Non grata' vendim i politizuar, është paekuivok", Berisha: Kontrata e PD me LaCivita është për konsulencë elektorale, jo lobim

sali berisha

TIRANË- Kryetari i PD-së, Sali Berisha tha sot për gazetarët se "Non grata" është konsideruar vendim politik, i administratës Biden. Gjatë fjalës së tij, Berisha u shpreh se qëkur ka lënë detyrën si kryeministër nuk ka kërkuar asnjëherë vizë për në Shtetet e Bashkuara të Amerikës. 

"Pyetja është se, non grata është konsideruar vendim politik, është dënuar, ky është dënim i atij vendimi. Se është tjetër kur shqyrtohet dhe kjo apo ai qëndrim, por është shpallur; vendime të politizuara të administratës Biden, është paekuivok.
Pra është e pashpresë. Nuk kam kërkuar vizë për në SHBA. Asnjëherë nuk kam kërkuar vizë pas lënies së detyrës së kryeministrit.", tha Berisha. 

I pyetur për pagesën që Chris LaCivita ka marrë, kryedemokrati tha se kontrat e PD me drejtuesin e fushatës është kontratë për konsulencë elektorale dhe jo për lobim. Më tej shtoi se çdo pagesë dhe çdo transaksion do të depozitohet në kohën e duhur në KQZ siç e kërkon ligji. Berisha theksoi se kontrata me LaCivita është 100 përqind korrekte dhe e pastër.

"Partia Demokratike ka një kontratë me Chris LaCivita, absolutisht jo për lobim. Për këtë të jeni 100% të sigurtë. Kontrata me Chris LaCivita është kontratë për konsulencë elektorale dhe këto janë të ndryshme në ligjin amerikan. Pra, kjo është e vërteta.
Por siç keni parë çështja ime ka tërhequr vëmendjen e dhjetëra analistëve nga më të shquarit. Me dhjetëra shkrime dhe këtu një gazetar përsëri, që unë nuk e njoh atë gazetar, më thonë që qenka korrespondent në Shtëpinë e Bardhë, është një gazetar që ka drejtuar një pyetje në zyrën përkatëse të marrëdhënieve publike të DASH.

LaCivita nuk ka asnjë lidhje me këtë çështje. Do të paguhet patjetër për konsulencë elektorale. Shiko, çdo pagesë, çdo transaksion do të depozitohet në kohën e duhur në KQZ, siç e kërkon ligji. Por mos harroni, sigurisht LaCivita është personaliteti më i shquar në fushë domenin elektoral që ka shkelë ndonjëherë në Shqipëri. Unë e kuptoj kureshtjen normale të gazetarëve. Por këtu kompani konsulence ka pasur gjithnjë dhe mund të ketë 2-3 kompani dhe është një standard normal sot, për të gjithë. Kontrata do të depozitohet siç e kërkon ligji. Ju siguroj se është 100 përqind korrekte dhe e pastër.", u shpreh ai.

sali berisha