I ftuar në emisionin ‘Kafe Shqeto’ në Syri TV, pedagogu Gjok Vuksani ka akuzuar kryeministrin Edi Rama për gjuhën fyese ndaj s...
POLITIKE
5 orë në Komisionin e Ligjeve/ Çfarë raportoi Altin Dumani për punën e SPAK gjatë këtij viti
I.APërditësimi i fundit 22 Maj 2024, 16:00
Altin Dumani
TIRANË- Kreu i Prokurorisë së Posaçme kundër Korrupsionit dhe Krimit të Organizuar Altin Dumani ka raportuar ditën e sotme në Komisionin e Ligjeve për punën e institucionit që drejton. Fillimisht i pyetur për projektrezolutën anti-korrupsion e paralajmëruar nga mazhoranca përmes ndryshimeve ligjore, Dumani e konsideroi këtë si të panevojshme. Kreu i SPAK deklaroi se nuk ka nevojë për ndërhyrje ligjore sa i takon funksionimit të SPAK dhe pavarësisë së tyre.
“Prokurorët e SPAK janë të pavarur e ndihen të pavarur. Këtë pavarësi ia ka garantuar ky kuvend me ndryshimet Kushtetuese e Kornizën ligjore. Korniza ligjore aktuale na e gartanton pavarësinë institucionale. Ky është roli im thjesht ta adresoj. Nuk kam ndërmend ta ndjek ecurinë e mëtejshme. Për mua personalisht mos e llogarisni fare. Unë jam shumë i kënaqur me mandatin 9-vjeçar. Mendoj se duhet të ndodhin këto ndryshime i kam përmendur këtu e në raport. I kam adresuar i bindur se e drejta për të rinovuar mandatin do të kontribuojë në vijimësi të institucionit”, tha Dumani.
Duke folur për amnistinë që iu bë të dënuarve gjatë muajit që kaloi, Dumani tha dhënia e amnistisë është kompetencë e Kuvendit dhe sipas tij SPAK nuk mund të ndërhyjë. Por Dumani shtoi se për amnistinë është marrë mendimi i institucionit në fazën e parë, por jo për mënyrën si është miratuar.
“Dhënia e amnistisë është kompetencë e Kuvendit dhe ne nuk mund të ndërhyjmë. Është marrë mendimi nga institucioni në fazën e parë dhe jo në mënyrën sesi është miratuar. Kuvendi e di vetë sesi e ushtron këtë ndryshim ligjor,” tha Dumani.
Sipas Altin Dumanit bankat dhe bizneset shqiptare po për përdoren si ndërmjetës nga organizatat kriminale ndërkombëtare për pastrimin e parave në vendin tonë. Dumani tregoi se mënyra kryesore për pastrimin e parave mbetet investimi në prona të luajtshme dhe të paluajtshme në Tiranë dhe në zonat turistike si Durrësi, Vlora dhe Lezha.
"Investimet në prona të luajtshme dhe të paluajtshme mbetet mënyra kryesore për pastrimin e parave në Shqipëri, veçanërisht në apartamente, ndërtesa dhe njësi shërbimi në Tiranë dhe zona turistike kryesisht në Vlorë, Durrës, Lezhë. Gjithashtu një numër i konsiderueshëm parash dyshohet se depozitohen në llogari bankare në emra shoqërish tregtare ose të afërm të të dyshuarve. Një nga skemat komplekse të pastrimit të parave në Shqipëri përfshin përdorimin e bankave dhe bizneseve shqiptare si ndërmjetës për organizatat kriminale ndërkombëtare, si mafia italiane. Një rast një biznes shqiptar bashkëpunoi për ti dhënë akses përfaqësues të mafias ndërkombëtare të integronte të ardhurat kriminale në sektorin bankar për shtresëzimin e transfertave që pastaj do të tranferoheshin po me ndihmën e biznesit vendas jashtë vendit. Bashkëpunimi shumë i mirë me bankat e nivelit të dytë, bëri që ky operacion i grupeve kriminale të dështonte," tha Dumani.
Një tjetër pikë që Dumani ka raportuar në Komisionin e Ligjeve, janë dhe lidhjet e drejtuesve të lartë të policisë së Shtetit me krimin e organizuar. Sipas tij ky është fakt shqetësues duke shtuar dhe numrin e punonjësve të policisë që janë proceduar. Dumani tha se ende nuk ka asnjë indicie se operacioni i SPAK "Revanshi" ku u lëshuan 50 urdhër arreste është dekonspiruar.
"Është e rëndësishme të bëjmë dallimin mes shumicës absolute të punonjësve të policisë që janë të angazhuar ditë e natë në luftën kundër krimit dhe korrupsionit, duhet ti diferencoj ata nga një pakicë e inkriminuar. Në shumë nga hetimet tona kemi evidnetur lidhje të krimit të organizuar me drejtues të lartë të policisë së shtetit. Korrupsioni në radhët e policisë është problematike. Janë proceduar nga ne rreth 70 punonjës policie. Na kanë rezultuar drejtues të lartë të policisë së shtetit të lidhur me krimin, është ulëritëse kur bëhen pjesë dhe bashkëpunojnë me krimin e organizuar. Ish-drejtori i operacionales, disa shefa krimesh, dhe nuk rri dot pa e adresuar këtë shqetësim, por që kemi një bashkëpunim shumë të mirë me policinë e shtetit nuk mund të rri pa e thënë. Nuk kemi indicie që operacioni është dekonspiruar," tha Dumani.
Ndërsa për 'kokat e krimit' që kanë gjetur strehim në Dubai, Dumani u shpreh se kjo është një çështje mjaft problematike, e cila deri tani nuk ka gjetur zgjidhje. Ai theksoi se ky problem është adresuar, por shton se me të njëjtin shqetësim, janë duke u përballur edhe shtete të tjera europiane.
“Ekstradimi nga Dubai, detyra jonë është ta adresojmë si problematikë. Këtë e kemi bërë që një vit më parë. Ne kaq kemi në dorë, thjesht të adresojmë. Kjo problematikë vazhdon të thellohet. Numri i personave që janë në Dubai dhe janë në kërkim vazhdon të rritet. Ne jemi në kontakte edhe me kolegët tanë në Europë dhe kanë të njëjtën problematikë. Ka edhe raste kur këto shtete kanë marrëveshje për ekstradim, por sërish ai nuk është kryer”, tha Dumani.
Kreu i SPAK, Altin Dumani gjatë raportimi të tij në Komisionin e Ligjeve për raportin vjetor ka kërkuar që prokurorëve të posaçëm pas përfundimit të mandatit 9-vjeçar tu jepet mundësia për të rikandiduar dhe rizgjedhur. Dumani gjatë fjalës së tij u shpreh se një prokuror dashurohet me çështjen e tij dhe e njeh në çdo detaj prandaj nuk mund t'i ndërpritet puna. Sipas Dumanit nëse në përfundim të mandatit 9-vjeçar detyrohet të largohet, pastaj do të diskutohet fati i çështjet
"Çështja nuk ka të bëjë me interesat e karrierës tonë personale. Së pari është i njohur konstatimi që kudo ku ka mandat nuk ka qëndrueshmëri në rezultate. Së dyti mendojeni në një rast të tillë ku është një hetim që kërkon kohë, mund, bashkëpunim me agjenci brenda apo jashtë vendit. Ju keni hetuar, keni grumbulluar provat, hetimi po shkon mirë, bukur dhe një ditë të bukur prokurorit i ndërpritet mandati. Problemi është sa efektiv do të jetë ai tjetri. kur ti heton vetë një çështje e ndjek që nga dita e parë, fillon e dashurohesh me çështjen, e njeh në çdo detaj, edhe në 12 të natës kur ti je në gjumë, je në gjendje të dish ku është pika e fortë e çështjes dhe ku është pika e dobët, cilat janë veprimet që ke kryer dhe kush është veprimi i radhës që do të kryhet, cili është veprimi më rezultatit që mund të çojë, mjeti i kërkimit që të çon tek provat. Nëse në përfundim të mandatit 9-vjeçar detyrohesh të largohesh çështja pastaj do të diskutohet fati i çështjet. Do të gjendet dikush patjetër, na është dhënë shansi të jemi këtu ku kemi, por ka patjetër kolegë që mund ta bëjmë njësoj si ne apo edhe më mirë, por do ta trajtojmë nga ana e vazhdimësisë, ecurisë së institucionit, hetimeve të ngritura nga ana e institucionit. Së treti ka të bëjë me sigurinë juridike. Për vijimësinë e mandatit, nuk jam shprehur për një mandat në mënyrë automatike, por ti jepet mundësia për tu rizgjedhur, të konkurrojë me prokurorë të tjerë," tha Dumani.
Dumani ngriti dhe disa shqetësime të tjera si mungesa e referimeve nga institucionet publike si dhe numri i procedimeve të mbartura. Dumani gjatë fjalës së tij theksoi se ILDKPI nuk ka bërë asnjë referim dhe se është e fundit në bashkëpunim me SPAK.
“Të nderuar deputetë, ne kemi paraqitur disa shqetësime që shpresojmë të gjejnë zgjidhje, mungesa e përcaktuar qartë në kuadrin ligjor në lidhje me ekzistencën e prokurorëve pas përfundimi të mandatit, mungesa e këshilltarëve ligjorë, adresimi i ngarkesës të shtuar ndaj drejtuesit të SPAK mbi çështjet e prapambetura të rivlerësimit të magjistratëve pas marrjes së kompetencës të komisionerit publik, mungesa e referimet nga institucionet publike, numri i procedimeve të mbartura”, tha Dumani.
