Vdekja e punëtorit në Vlorë dhe minatorit në Bulqizë/ "Shteti hesht", Qori: Lëvizja Bashkë çështjen e punës e ka parësore, do çojmë zërin e njerëzve të punës në Kuvend

arlind qori

TIRANË- Kryetari i Lëvizjes Bashkë, Arlind Qori ka reaguar lidhur me vdekjen e dy punëtorëve ditën e sotme në vendin e tyre të punës. Një 38-vjeçar humbi jetën teksa po punonte në aeroportin e Vlorës, ndërsa një minator vdiq pas shembjes së një masivi gurësh në galeri. 

Në një video të postuar në rrjetet e tij sociale, Qori shprehet se pavarësisht këtyre ngjarjes alarmuese, shteti nuk do tja dijë, ndërsa e ka cilësuar Inspektoratin e Punës si një "strukturë parazitare". Ai thotë se përveç partisë që ai drejton forcat e tjera opozitare nuk flasin kurrë për punën dhe punëtorët. Qori thotë se për Lëvizjen Bashkë çështja e punës dhe punëtorëve është parësore jo vetëm në programin e tyre por në historinë shumëvjeçare si aktivistë. 

"Sot në Shqipëri kanë vdekur dy punëtorë. Një punëtor ndërtimi, 38 vjeç, në ndërtimin e aeroportit të Vlorës dhe një minator 48-vjeçar në Martanesh. Fatkeqësisht gjëra të tilla ndodhin shpesh në Shqipëri. Po ç’është më revoltuese është se një shtet i tërë nuk do tja dijë për vdekjen në punë. Inspektorati i Punës nuk ekziston. Është një strukturë tejet parazitare dhe e korruptuar. Po ashtu, policia, prokuroria të gjithë flejnë gjumë. Fatkeqësisht kemi një kryeministër qeë krenohet se në Shqipëri nuk ka sindikata dhe ja një nga mungesat e efekteve të mungesës së sindikatave që mbrojnë të drejtat e punëtorëve. Punëtorët vdesin dhe askush nuk do tja dijë, vetëm disa portale e kanë dhënë si lajm. Mirëpo ne kemi dhe parti opozitare që nuk flasin kurrë për punën dhe punëtorët. Përveç Lëvizjes Bashkë. Për ne çështja e punës dhe punëtorëve është parësore dhe jo vetëm në programin tonë por në historinë tonë shumëvjeçare si aktivistë. Me minatorët, naftëtarët, punëtorët e fasonerisë. Nësë ju njerëzit e punës na jepni mbështetjen, Lëvizja Bashkë do çojë në Kuvend, zërin dhe shpresat tuaja për një vend punë dinjitoz dhe të sigurtë.", shprehet Qori.

arlind qori