Ish-kreu i Autoritetit Rrugor Shqiptar (ARRSH), Gentian Gjyli, dhe ish-drejtori i Korporatës Elektroenergjitike Shqiptare (KESH), Erald Elezi, janë ...
POLITIKE
8 Dhjetori/ Tabaku: Sistemi i padrejtë po largon të rinjtë! Shqipëria ka nevojë për ndryshim
PiranjatPërditësimi i fundit 8 Dhjetor 2025, 12:33
Në Ditën Kombëtare të Rinisë, deputetja Jorida Tabaku, ka folur për një nga krizat më të mëdha që po përjeton Shqipëria sot: largimin masiv të të rinjve dhe rënien dramatike demografike.
Tabaku theksoi se në vetëm 13 vite numri i të rinjve është tkurrur me 45%, ndërsa 1 në 2 të rinj është larguar nga Shqipëria në kërkim të një jete më të ndershme dhe më meritokratike.
“Ëndrrat e një brezi që kërkoi ndryshimin dhe e arriti atë gati tre dekada e gjysmë më parë po shuhen dita-ditës,” u shpreh Tabaku, duke theksuar se një sistem i padrejtë dhe i kapur nga interesat e pakicës po e plak kombin me shpejtësi të frikshme.
Në këtë Ditë të Rinisë, mesazhi i saj është i qartë: Shqipëria ka nevojë për një ndryshim të thellë, për një ekonomi të hapur, një arsim me standarde të larta dhe një treg pune që vlerëson aftësinë, jo lidhjet politike.
Postimi i plotë:
Për shumë vite, rinia ka qenë burimi i shpresës së këtij vendi dhe mundësia jonë më e madhe për të konkurruar me botën.
Por sot, ëndrrat e një brezi që kërkoi ndryshimin, dhe e arriti atë gati tre dekada e gjysmë më parë, po shuhen dita-ditës.
Një sistem i padrejtë po e plak kombin me shpejtësi dramatike.
Në vetëm 13 vite, të rinjtë janë tkurrur me 45%, ndërsa 1 në 2 të rinj ka braktisur vendin për të kërkuar një jetë më të ndershme diku tjetër.
Si pedagoge, e kam parë nga afër këtë plagë kombëtare. Shumë prej studentëve të mi janë larguar nga Shqipëria për shkak të mungesës së meritokracisë dhe mundësive. Vajza dhe djem të talentuar, që në çdo shoqëri normale do të ishin e ardhmja – këtu nuk gjejnë dot një derë të hapur.
Sepse ky sistem i ngritur në 12 vite nuk punon për ta.
Punon për t’i zëvendësuar.
Për t’i shtyrë drejt ikjes, duke u zëvendësuar me të pazotët, me të preferuarit e pushtetit, me klientët e korrupsionit.
Kemi një arsim të dështuar, një treg pune të mbyllur, një ekonomi të kapur, ku talenti nuk vlerësohet dhe ku suksesi nuk fitohet, por jepet.
Koha ka ardhur të ndryshojmë këtë sistem.
Të ndërtojmë një Shqipëri të ndershme, të hapur, të drejtë.
Një Shqipëri që i jep mundësi të rinjve dhe nuk i detyron të largohen.
Një Shqipëri ku secili ka shansin të shkelqejë me aftësitë e veta dhe jo me lidhjet e veta.
