Akuzohet për fshehje pasurie, GJKKO kthen çështjen për hetim në SPAK për Asllan Dogjani, deputeti: Sot është triumf i drejtësisë por shpresë edhe për qytetarët

TIRANA- GJKKO ka kthyer çështjen për hetim në SPAK për deputetin Asllan Dogjani i cili akuzohet për deklarim të rremë pasurie. Gjykata e Posaçme i ka lënë prokurorëve të çështjes, 2 muaj kohë për të plotësuar hetimet. Pas daljes nga GJKKO, Deputeti e shprehu si një triumf këtë vendim ndërsa nuk kurseu akuzat ndaj kryeministrit Edi Rama.

"Ka kthyer Shqipërinë në vend mbeturinash. Gjykata me vendim të ndërmjetëm ja shpallur ndërmjetim. I caktoi të kryhen edhe një herë. Kjo vepër penale e supozuar ku është bërë nga një mashtrues qe e kamë kallëzuar për vjedhjen e pronës publike. Është shenjë hakmarrje. E kam denoncuar me banorët për grabitjen  e pronës publike. Sot është triumf i drejtësisë por shpresë edhe për qytetarët. Të denoncojnë çdo hajdutëri. Gjykata u dha një shpresë qytetarëve", tha Dogjani.

Prokuroria e Posaçme Kundër Korrupsionit dhe Krimit të Organizuar mbylli hetimet disa javë më parë dhe përcolli pranë Gjykatës së Posaçme të Shkallës së Parë për Korrupsionin dhe Krimin e Organizuar kërkesën për gjykim ndaj të pandehurit deputetit të PD, Asllan Dogjani. Sipas njoftimit zyrtar, Dogjani akuzohet për kryerjen e veprës penale deklarim i rremë i pasurisë në lidhje me një apartament që ai ka përfituar.

asllan dogjani